صبرى محمد علي (العيكورة) يكتب… بعيداً عن السياسة).. يا أستاذ الجامعة (الكويسه ياتا)!!

بالأمس علي خلفية مقال (الرقم الجامعي) بالجامعات الخاصة و ردتني الكثير من الإستفسارات حتى ظننت أنني من أباطرة العلم الذين يُستشارون في شئون التعليم

 

بعض الإستفسارات كانت تسأل عن إسم الجامعة التي خرّجت طالب الهندسة وعجزت عن إستخراج الشهادة لعدم وجود رقم جامعي له

و بالطبع هذه الواقعة صحيحة و نحتفظ بالمستندات و لكن لا قواعد النشر و لا المروءة تسمحان بذكرها

 

أما السؤال الذي كان أشد إلحاحاً هو

*يا أستاذ أي الجامعات الخاصة أفضل؟*

 

وبالطبع هذا سؤال صعب وقد يقودني نحو الدعاية أو الترويج الإستثماري .

 

ولكن هذا لا يمنع من الكتابة وفقاً لتجربتي الشخصية الخاصة وإنطباعي عن ثلاثة جامعات تعاملت معها على نطاق الأسرة و هي …..

جامعة الرازي و الجامعة الوطنية وجامعة السودان العالمية

*و في كًَُلٍ خير*

 

كُلّها …..

تستقبلك أنت و إبنك أو إبنتك أول يوم تسجيل بعبارة شركات خطوط الطيران

*نشكركم على إختياركم لجامعتنا* وكلام من هذا الذي مِنّو و دُقِّي يا مزيكا دُقِّي !

 

جامعة السودان العالمية لم أركز مع المباني كوني زرتها مرة أو مرتين

أما الرازي بسم الله ما شاء الله (قيافة وفايته الناس مسافة)

 

(بروف) رزق ما زي أبوك لكن بربيِّك غايتو

أوول يوم قال لينا

كل زول يعاين في الطربيزة القدامو دي

كلنا يا مؤمن يا صديق عاينّا

شايفنها جديدة و نظيفة كيف!

ااي و الله يا (بروف) ماشاء الله

عاوزها آخر السنة تكون كده

حاااضر يا (بروف)

بعد شويتين ….

أخدنا درس في الأخلاق عن الهندام و اللبس و الشعر المنفوش و البالطو المجدوع على الكتف والسُلطات المطلقة لحرس الحدود…!

(اللهم طولك يا روح)

 

وبعد الساعة خمسة

أيوه يا (بروف) سامعنك

كل زول يمشي (يتغدا) فى

في (بيتو)

 

ولا (قرد) داخل الجامعة ما عاوز أشوفو

يا (بروف) …!

طيب الأنشطة الثقافية والسياسية !

(قال ليك) ممنوع نهائي!

بصراحة كده

(أخدت) لي ضحكة برااحة

وبي قلبي قلت …

حتى إنتا يا رزق؟

يا رزق

(إنتا) البتقول الكلام ده!

 

ياخ (إنتا) كنت مِوقِّف الأمن المصري على (كُراع) واحده في جامعة الإسكندرية

 

أمرنا لله

حاضر يا (بروف)

لكن الحق يُقال جامعة مُرتّبة و منضبطة و

*(عِلِم زي العِلمِ)*

خامس جامعة في السودان حصلت على عضوية الإتحاد الدولي ومقره (تركيا) و هذه عضوية

(مُش أي كلام)

 

*الوطنية*

دي بقى كلام تاني في الأُبّهة والفخامة و تُعتبر من الجامعات (أبو سريعة) الإسبوع (فل)

سبت ما سبت (أنسى)

عيد إستقلال و حاجات بالشكل ده

ولا تفكر فيها

(عندنا بكا) وعاوز لي يومين الكلام ده مافي

نظافة تحيرك …

ورقة واحده (واقعه) في الحوش

قضية يُعلن لها (بروف) قرشي حالة الطوارئ القصوى!

إلا يسلموه صاحب الجُرم !!

 

بعدين عندما يحين وقت القسط

قروش يعني قروش

 

تقفز رسوم التسجيل ضعف رسوم القبول دي ما شغلتو تدفع بس !

 

*لكن بصراحة علم زي العلم* يخرِّجك راسك لافي وأنت لم تلتقط أنفاسك بعد

 

مشكلتهم في ….

منع دخول (ذوات النقاب)

والحكاية دي محتاجة من الجامعة إنتداب شيخين عند الباب أحدهما يُحرِّم ظهور الوجه والكفين والآخر يجوزهما

و الكل يدخل حسب فتوى الباب

و بالفقة سَعَة و الحمد لله

 

*العالمية*

أما جامعة السودان العالمية (بروف) بكري فلا تقل عن سابقاتها من حيث الفخامة و التميّز الأكاديمي

لكن ياخ ….

عندهم واحد (إسمو) (جومين)

ياخ الزول ده معذِّب الخريجين عذاب !

الشهادات … جومين

السداد … جومين

السكن ….. جومين

سداد رسوم الصور جومين

جومين لا يرُد على التلفونات

جومين سافر أهله

جومين (قافل تلفونو)

يا (بروف) بكري ….

ياخ معقول مُشرف داخليات

(يبقى بتاع كُلُّو)؟

 

و أنصحك يا بروف بكري لوجه الله

 

فتِّش عن (بروف) إشراقة بشير مدير الشؤون العلمية السابقة

من السماء للواطه

تجيبها للجامعة

ياخ دي ….

(زولة) ظريفة و فاهمة وهادية و بتحلحل ليك (شِبك) جومين ده بي كلمتين

وأسألني أنا …

 

و قد عشت التجربة بكل تفاصيلها .

لكن بجد يا جماعة العالمية برضو

*(علم زي العلم)*

وأعتقد أن ….

(بروف) بكري محتاج يتفرغ أكثر لمتابعة الجامعة

وما حكّ جلدك

مثل جومين

أأقصد ….

مثل ظفرك

 

بالتوفيق لكل جامعاتنا الخاصة و أبنائنا و بناتنا الطلاب

 

*لحظة يا بروف*

بالله يا جماعة و مع كل بداية عام جديد و قبل أن تُحدِّدوا رسوم التسجيل الجديدة (المُخيفة ديك) تذكروا ……!

 

(وأتقوا يوماً تُرجعون فيه الى الله) …. الآية

 

 

الأثنين ٢٨/سبتمبر/٢٠٢٦م