(خمة نفس) عبدالوهاب السنجك يكتب : لعبة ملوص

قد لايعرف الكثيرين في هذا الزمن ما هي” لعبة ملوص”.. حا احكي ليكم..

في زمن الجاهلية السودانية اي من قبل اعلان المشير المرحوم جعفر نميري قوانين وتطبيق الشرعية الاسلامية في السودان مضمونا وعملا بها، كان كل شئ متاح،،،، اي متاح عديل كدا وعلي عينك يا تاجر.. من الداخل وخارج الحدود..في ازقة واحياء بعينها وقليلا منها تجد لافتة عند المدخل “منزل احرار” كفاية لغاية هنا من فضلك… ما تخش في الغريق السترة واجبه.

.. الخرطوم بالليل.. ومدني بالنهار.. ويوم الخميس في الحصاحيصا…
… سينما كليزيوم والخواجة.. دعاية..البيرة ابوجمل كب لي بكبابي الشوب..

.. لعبة ملوص.. شجرة النيم الموجودة حاليا ما ماتت بموقف مواصلات الحصاحيصا الخرطوم..
يجلس ذاك مفترشا قطعة قماش بيضاء ممسكا بسبحة لالوب.. سبحان الله…زول نضيف ظريف متربعا جعل من ساق شجرة النيم متكآ لظهره الطويل الممشوق..

من حوله شباب في مقتبل العمر…لقد وضع المصيدة للصيد الثمين القادم من جهة السوق الكبير..
… ثلاثتهم يتبادلون اطراف الحديث دعوة للجلوس من امام الرجل الذي يخرج من جيبه لفافة خيط (خيط لمبة) المعروف في ذاك الزمن الجميل..

.. أها كيفن… معاي طرادة فئة (خمسة وعشرون قرشا) يعني حاجة كتيرة جدا…في تلك الحقبة..
صاحبنا يلف الخيط في شكل دائرة طالبا بوضع العود وسط اللفة.. وبأحترافية يضع الشاب العود في قلب اللفة.. ليكسب طرادة وتدور الدائرة استقطابا للاخرين…ليقع الصيد في المصيدة…يكسب ثم يكسب…ويكسب في كل مرة..

وفجأة تتغيير موازين القوة لصالح الممسك بخيوط اللعبة “الملوصية” وكلما اراد اللاعب طلب انهاء اللعبة يقول له… لسع انت شفت حاجة نحنا يادووب بدينا… “تحسبو لعب” واصل سااااكت حا اكتم نفسك واكمل الوراك والقدامك..

والخيط مدور…خسارة في خسارة واللعبة تحلو بجد.. كنا وين واسع وين…

ما ساقني لهذه المقدمة نقول الحكاية” الملوصية” دولة الشر الامارتية الجاهلة التي لاتعرف باننا اهل الملوص ذاتوااا،،، تطلع من جيوبا ونحنا نلف شريط اللمبة ونخرتاااا،،، نعصرااا

عصر لمن تجيب الزيت وتقول الرووب كمان.. وهي شافت حاجة والجماعة المعاها شافواا حاجة، كلما عايزة تقوم نقول ليها لسع الزمن طويل ولعبة الملوص فورتاااا عندنا لانو خيط اللمبة بنعرف طريقة لفتوا وتاني ما بتقدري تدخلي العود عشان تكسبي ولا شلن.. انتي تجيبي ونحنا نخرت بس. لمن تعرفي النجوم نص النهار.

اولاد بن زايد واولاد حفتر والولد كاكا والابن العاق سلفاكير ختوا كرعينن في شرك ام زيردوا، اما الحبشي نقول ليهو اطلع من اللعبة ما بتقدر علينا، لانو كان دورنها بتلف عليك، نحنا صبورين وحبل الصبر كان انقطع انت الخسران، والله الا كان تدق زار حبشي وتشوف اولاد ماما عز الضهر.

(خمة نفس)
وزارة التربية والتعليم في ولاية الجزيرة (الشبال ومافي شعر) تعلن افتتاح المدارس، ونقص كبير في المعلمين… تصدقوا كما قيل لنا (19)الف معلم لمرحلتي الابتدائي والمتوسط (4) الف معلم جاهزين (لم شمل) لم يتم استيعابهم حتي الان.. ودقي يامزيقااااا