الحاضر أحدث الغايب… البرهان جاي حلتنا!!
الظهيرة- حسن الدنقلاوي :
نحنا ناس قريتنا كجنة الخلد منقوشة في وسط ولاية الجزيرة قرية كل خيرات الدنيا مجموعة فيها العيش والدخن والقمح والبصل والفول والطماطم والكبكبي واللوبيا العدسي واللبن والروب والسمن.
كل هذه الخيرات الحمد لله محصورة في داخلها ونواحيها والحمد لله مافيها زول ما مشي الضحوة ولا عندنا دعامي ولابنعرف اطاري ولا فينا قحاتي شليق ولا بنعرف وتساب البنعرفوا كل جيب تيراب وامش اسقي الزراعة وجيب معاك قش للبهائم.
قريتنا ترابها عنبر وحصباؤها عقيق وهوائها نسيم وماؤها رحيق قرية معشوقة السكني رحبة المثوي يومها غداة وليلها سحر قرية واسعة الرقعة طيبة البقعة واسطة ولاية الجزيرة وسرتها وغرتها وجهها وغرتها.
قرية تحلق بالجو تناجي السماء بفضل الله ويسبح اهلها بحمده قرية تتوشح بالغيوم وتتجلي بالنجوم.
قرية دار قرار توسع العين قرة والنفس مسرة منها تخجل القري وتتقاصر قرية اقترن اليمن بيمناها واليسر بيسرها قرية الجسوم منها في حضر والعون علي سفر دار دار بالسعد نجمها وفاز بالحسن سهمها خدمها الدهر لأنه أرض تراحم وبركة ياويها البدر ويكنفها النصر وهي مرتع النواظر ومتنفس الخواطر.
فسقف احلام أهلها ليس إدخال الكهرباء ولا مستشفى ريفي ولا محطة مياه للشرب ولا مدرسة.
فحلم اهلها الطيبن الركع السجود أن يزورهم الفريق أول عبدالفتاح البرهان زيارة ليس لمشروع تنموي ينفذه أو أمر عصب علي حكومة الولاية فيقضية.
ولكن ليقف علي جمال السجاد الاخضر الذي الفروش علي عرض الارض ولازم اللازم يتصور معانا سيلفي وسط الفول والعيش والبصل ونرسل رسالة لكل الخونة بعنوان وسط الحقول متصور وجهه الصبوح منور واشرب معانا لبن وروب ونديه شوال عدس كرامة وسلامة لقواتنا المسلحة الباسلة.
وياناس المراسم نحنا في حلتنا مافي برتكول يعني جيشنا واحد وشعب واحد والزيارة ضحوة.
والقائد اشوف الفول قفل الخط والعيش شره والبصل اتشتل وشرب الموية التانية واطمئن علي علي النازحين كان قصرنا معاهم ونعلن ليه بيعتنا ان نكون مع القوات المسلحة الباسلة في خندق واحد ونعلن ترقيته لرتبة مشير حبا وعرفاننا للقوات المسلحة …..
نردد معه مرحبيتن بلدنا حبابا……
