(خمة نفس) عبدالوهاب السنجك يكتب : يااا د.كامل إدريس… خزينة البلد ماشة بالضرائب!!
المشهد:
حاج حمد هز راسو وقال:
يازول والله كلامك صاح.. البلد دي ضرائبها هي البتمشي الموظفين والمستشفيات والشوارع المكسرة دا.
يجي د. كامل يقيف في نص السجانة ويقول للتجار: “يا جماعة 2023 و 2024 ما تدفعوا”؟ كأنو الضرائب دي قروش بتقع من السما في الخزينة
حاج سيد أحمد:
ضرب كف بي كف:
المشكلة يا حاج حمد إنو التجار مسكو في الكلمة دي مسكة المكنة في المسمار.
واحد في مدني قال لي: “يا زول رئيس الوزرا قال ما ندفع، الدافع منو؟”
والتاني في الأبيض قفل دكانو وقال: “أنا منتظر المنشور الرسمي حق الإعفاء”.
ياخ منشور شنو؟ الزول رماها كلام شفاهي ساي في السوق ومشى في دربوا.
حاج حمد اتنهد:
ياخي الدولة مركزة علي الضرائب دي قانون وميزانية، ما ونسه في سوق.
المفروض قبل ما ما يتكلم وتشيلو الهاشمية، مستشارينو يمسكوه بالجنبة:
“يا دكتور، السوق تعبان لكن الإعفاء دا بيعمل فراغ في الخزينة العامة وبتقدها، والناس كان التزمت ودفعت حتقول ظلمونا، والما دفع حيقول اشمعنا”.
يدرسوها، يشوفو القطاعات المتضررة جد جد، يطلعو بقرار مكتوب، موقع، ومختوم لعشان كل حاجة تمشي عدل.
حاج سيد أحمد: ضحك ضحكة وجع:
هسي داير تقنعني د. كامل حيقدر حا يتراجع من كلامو؟
بكرة يطلع في التلفزيون يقول: “يا جماعة أنا كنت بقصد نراجع، ما قلت ما تدفعوا عديل”.
والتاجر المسكين يكون ركب ماسورة مع ناس الضرائب، والغرامات ماشة.
وفي النهاية يقولوا ليك هيبة الدولة.
حاج حمد:
والله يا سيد أحمد، البلد دي ما ناقصة خمة نفس.
الزول المسؤول كلمتو محسوبة، وكان أحسن يسلم على التجار ويبارك ليهم العودة لانو كلامو
بين “ما تدفعوا” و “كنت بهظر” في موظف راتبو واقف، وفي شارع ما حيتردم، وفي تاجر حيتسجن ودا الكلام الما سمح برجعنا خطوات للورا وممكن يولع السوق ويهدم الاقتصاد.
حاج سيداحمد:
تفتكر ممكن د. كامل يتراجع من كلامو للتجار!!
حاج حمد:
ممكن طبعاً، لكن التراجع عندو فاتورة. حيفقد ثقة التجار، وثقة ناس الضرائب، وثقة الشارع كمان. ومافي حل من غير يطلع بيان واضح بكرة قبل بعده: يا إما يأكد الإعفاء بمنشور رسمي ويورينا حيغطي العجز من وين، يا إما يعتذر ويشرح إنو المقصود كان “جدولة” أو “تخفيف” ما “إلغاء”.
لكن يرمي الكلام ويفكها في الهوا… دي خمة نفس جد جد.
حاج سيداحمد:
انت تعرف ياحاج حمد
الضرائب دي هي السادة ضهر البلد دي والميزانية موزنه على الضرائب وزنة ميزان دهب واي كدا ولا كدا يقلب الكفة عدييل.
حاج حمد :
لكن ياحاج سيداحمد
يظهر الموضوع فيهو كلام كتير وشد حبل شديد جوااا هناك واحسن انا امسك خشمي على، ودا حا يجيب كلام كعب تب.
تقصد شنو ياحاج حمد..
حاج حمد :
اقصد اسع ولاية الجزيرة مالاقيا من الحكومة الاتحادية اي حاجة ماشة بقدرة قادرة.. شئ من ادارة البترول وشئ من الضرائب الجهجهو دي وإذا نقص واحد منهم حا تقع في الواطة.. وبعدين نقول.. الرماد كال حماد..
حاج سيداحمد :
غايتوا انت اصلك فاهم اكتر مني غايتوا والزمن دا زمن الحجة بالحجة والمنطق بالمنطق لكن كلام رئيس الوزراء في الوقت دا ما وقتواا ولامناسب عشان الخزينة ما تنقد..ونقعد نكورك السوق حرقنا حريق، والله رايك شنو ياحاج!!
حاج حمد :
كلامك سمح والله ياحاج سيداحمد احسن الحكومة لو عندها حاجة تعلن كلاما في قرار ولا منشور عديل عشان البلد ما تتحمل اكتر من كدا..
واسع انا ماشي نتلاقى في الجامع عند صلاة العشاء.. نتونس شوية اها ياخوي معاك سلامة لمن نتلاقا.
(خمة نفس).
الجهد الذي بذل خلال الفترة الماضية من حيث تشغيل محطات المياة والكهرباء بالولاية يجب الوقوف عنده طويلا.. كيف تم ذلك!!
وزارة التخطيط العمراني والمرافق العامة والإسكان واضلاع المثلث القوية م. أحمد النعيم وم. بدرالدين عبدالله عبدالوهاب وكل العاملين بتلك الإدارات نقول جهد لا يقدر بثمن..في ميزان حسناتكم…
(خمة نفس)
شعب واحد.. جيش واحد..
الشعب المسلح لن يهزم
…..
رايك شنو.. نظم الشغل يامكنة
