صبري محمد علي (العيكورة) يكتب … بينما المسؤولة الأممية تزور (الأُبيض) كامل إدريس مشغول بتأهيل سير العفش بمطار بورتسودان!!

زارت المسؤولة الأممية المُمثلة للأمم المتحدة بالسودان مدينة الأبيض تحت حماية إستثنائية

*نظام الأبيض غير آمنة وكده*!!
و مُحاصرة كمان

المُهم …..
بعد وصولها بالسلامة و شاهدت بأم عينيها كيف تسير الحياة في كافة المناحي
و أدركت أن حكومة الولاية والمسؤولين من مدنيين و عسكريين
*شغالين زي الساعة* والحمد لله
(شويية كده)
ختت الرحمن في قلبها
والخوفة راحت
يا بت الناس
قولي بسم الله
جيبو الموية
جيبو الفطور
هجست شوية
كانت ترجف المسكينة
والله يجازي الكان السبب

الوليِّة ……
عقدت إجتماعات مع حكومة الولاية وشافت بي عينها كيف تسير الأمور و تأكدت (تمامن) أن حصار الأُبيِّض وسقطوها كان في وسائطهم وحلاقيمهم وأعزّ أمانييهم الخاسئة

(جات راجعة)
محملة بالهدايا الرمزية
قال ليك (بالقُفاف)

طبعاً نشكر (الولية) بت الخال براون على شجاعتها ونتمنى أن يكون تقريرها صادقاً وغير مُزوّر وأظن متابعة (الشُغُل ده) يقع تحت مسؤولية
(أولاد مُفضّل)
كان عدييل
كان زراعة محمية

لكن في المقابل تعال شوف…..
المفارقات وين فمثل هذه المهمة كان يجب أن يقوم بها رئيس الوزراء السيد كامل إدريس فور صراخ العالم الخارجي عن فرية قُرب سقوط مدينة الأبيض
على الأقل ياخ ….
يشرب ليهو كباية عرديب و يتصور و يرجع فستُرسل رسالة واضحة للعاام الخارجي
*و اللّا شنو يا جماعة !*

ياخ معقول ياخ
كلما حبيبنا (سافر و جا)
ودُوني مطار بورتسودان
وروني (سير العفش)
وأقعدوا فرّاجة ياخ !!

أستغفر الله العظيم

*الوقعت في البلد دي تختاها ياخ*!

الاثنين٦/يوليو/٢٠٢٦م