سلوى احمد موية تكتب… الزول سوداني!!
في الفصيح العامي كلمة زول عندنا في السودان بنادي بيها الرجل ومعناها في معجم المعاني الجامع (الظريف الشجاع. السمح الكريم. خفيف الحركات. الفطن الكيس اللطيف) جمعه (أزوال) والأنثى منه (زولة)
يازول كلمة لاتجدها الا في السودان وعادة بنادي بيها المفرد الغائب وعند الغضب والزعل ( يازول مالك) (يازول انت ماك نصيح) وللتعجب(شوف الزول دا بالله) (عليكم الله شوفوا الزول دا كيف). وللتودد بزضو(يازول اشتقنا ليك والله) (يازول غبت وين ماشايفنك) وكمان زول للسؤال وزيادة المعرفة(يازول اهلك من وين) (يازول انت من اي مدينة في السودان) وكلمة زول عند الملامة(الزول ماعندا زوق الزول منو سقاني المي الحوض الزول منو) . الزول السوداني في الشرق اوهاج وسيدي والهدع وفي الشمال محمداحمد و سوركتي وفي الجزيرة جعفر والخضر وفي كردفان احمد وعثمان في النيل الازرق طلحة ونعمان وفي الخرطوم عبدالرحمن وأيمن وعدنان في سنجا موسى وبانقا وفي دار فور هارون واسحق وفي جبال النوبة كوكو وكافي وكل اسم بمدلولاته البتحمل نفس الصفات السمحة من كرم وجود وشهامة
الزول السودانى هيبة ووقار جلابية وتوب وطاقية وعمة ومركوب جبة وسديري وسيف وسكين يا سمح يازين الزول السوداني زول براه من طينة متفردة لاهو عربي ولاهو أفريقي لكن خليط من كرم العرب واصالة الأفارقة.. في الكرم ديوانه فاتح وقدحه في الضرا برا وفي الجود اجواد مابلحقوا زول( يفضلوا الغير على زادم يقسموا اللقمة بيناتم حتى ان كان مصيرم جوع) زولا بكرم الضيف هجعة ليل يضبح ويحلف يقول حرم على الغاشي مايمشي بخاطرو الا يضوغ الزاد وفي الشهامة والشجاعة بموت عشان غيروا جاب راس قردون في مخلاية. فيه نخوة حيرت العالم الزول السوداني دايما راسه مرفوع وقامته عالية مابدليها سيف وما بركع الا للواحد القهار الرول السوداني في حرب الكرامة اثبت اروع انواع النضال والتكاتف والماسك خزلته المنظمات الإقليمية لكنه لم ينكسر حافظ على نسيجه المجتمعي
المابشبهه اي نسيج وسلوكه الإنساني المشبع بقيم الدين وعاداته الراسخة المتينة المبنية على الكرم التضحيات قدر يسند اخوه ويقيف مع الأرامل والايتام والمساكين والابو اتفقد او مأسور الزول السوداني متعاون عندو النفير في الزرع وبنا البيت عندو الجودة في حل المشاكل العائلية عندو أعراف بتمشي على كل سوداني. عندو الجد والحبوبة وحكايات الزمن الجميل ماعندنا دار عجزي ولا مسنين.
دا كلو كوم والزول المغترب في زمن الحرب كوم تاني. لو ضربت المليشيا الفاشر بتوجع الزول ألفي كندا ولو وقعت دانة في نيالا بتألم بيها الزول فرنسا دا بس بحكم انه سوداني. الزول السوداني المغترب تحدي المعجزات بقي شغال دوامين بدل دوام واحد عشان يقدر يوفر لأهله حق اللقمة و لي عمه حق العلاج ولأولاد اخته الايتام الابوهم استشهد بقزايف المليشا مصروف المدرسة زول ساند ضحايا الحرب/ دعم التكايا / أقام المبادرات/ تكفل بعلاج من لايملك حق العلاج/ الزول السوداني حير العالم كل البيانات الصدرت من المنضمات كانت بتاكد انه السودان ح يدخل في أكبر مجاعة بسبب الحرب لكن دا ما حصل ليه لانه السودان وراه رجال يغطوا عين الشمس واجهوا الواقع بشجاعة وشمروا سواعدم وركزوا
وقفوا لاهلم بكل جود وسخاء والزول الكان شايل اهلوا في السلم بقي شايل قبيلتوا في زمن الحرب لأنهم اهل حارة فيهم الأصالة والكرم والقلب الكبير سودانيين يعتزوا بالهوية السودانية وحب الوطن والأرض. الزول السوداني لما يتعامل معاك بتشعر بالدفء العفوية النابعة من جواه ما بتحس معاه بالغربة حتى مع الغريب اخو اخوان وشيال التقيل. الزول السوداني ليه ايقاعات
خاصة ممزوجة بسحناتنا وتضاريسنا الطرق الصوفية فيها الزكر و النوبة وعني الحقيبة والتراث عندنا في الشمال الطمبور الشايقي الغنى ليه النعام والسقيد والتم تم الغنى فيها كبوشية وفي الشرق سيدي دوشكا الزول السوداني بطرب ب بلدي ياحبوب والمامبو السوداني وبرقص مع إيقاع الكمبلا الوازا الجراري المردوم الكرنق والهسيس لهجات الزول السوداني كتيرة لهجة نوبية ورطانة زنجية ورندوك كمان
اهو دا الزول السوداني اسمر جميل فتان زولي الاخدر كان شفتو بخدر
وإن ماجيت من زي ديلا وااسفاي وا مأساتي واذلي.
