( كل الزوايا) عبدالرحمن دقش يكتب… (من قبيل شن قلنا ليك يا كامل ادريس ؟!! )
يا ( سعاده) البروف كامل الطيب ادريس رئيس مجلس الوزراء الانتقالي بحكومه الامل بالسودان الذي نذكره في ( نص) عام 2025م كنا نطالبك بالسير بخطوات متينه قويه نافعه لاخراج السودان من تلك الازمات التي استمرت طويلا قبل وبعد الحرب وكان اولها حكايات تعيينات الوزراء والوزيرات لحكومه الامل وان تكون بروح الوطنيه الصادقه وطالبناك بالاتجاه الي طبقه المستقلين وبس !!
* هل يا كامل ادريس كنت صادقا وامينا في اختيارات الوزراء والوزيرات ؟!! الواضح لا والف لا ووضح جليا ان الاختيار خرج وهو ( يتمسح ) ويدور حول الحزبيه وفيها الصداقه ( المنتظره ) وكان فيها ( جماعه ) اتفاقيه سلام جوبا 2020م ورجعت نفس الملامح !!
* لقد ذكرنا اليك يا كامل ادريس ان حرب ابريل 2023م كانت تمنحك بالقانون عدم ارجاع جماعه اتفاقيه جوبا في حكومه بعد الحرب ومعك الحريه ولكن يا كامل ادريس لم تنفذ ورجعت الجماعه واستلمت الوزارات العاليه المقام وكما لم تعرف الوطنيه وكانت سيطره الحزبيه والايدولوجيه والاخطر شاهد اهل السودان اللعب باوراق الوزارات !!
* يا كامل ادريس خلال عام كامل وزياده هل كان الوزراء والوزيرات يمشون في الدرب ( الصاح ) لصالح الوطن وطيب لماذا لم تشرح الي اهل السودان اسباب اقاله وزيره شؤون مجلس الوزراء وبعدها كان ( طرد ) واقاله وزير الشؤون الدينيه والاوقاف ودا برضو لماذا كانت اقالته ؟!!
* من الاشياء العجيبه جدا في عالم سياسه الحكم ان تكون هنالك حكومه ( ماشه ) وسائره بدون وزير او وزيره شؤون مجلس الوزراء والمسافه طولت شديد !! لقد ظلت حكومه الامل بالسودان بلا وزير او وزيره لشؤون مجلس الوزراء ردحا من الزمان ومنذ ذلك الوقت المعوج تفقده وذهب الي مهب الريح من الاقالات ولكن كان ( الصاح ) ان توضح اسباب الاقالات وفورا ادخال الجديد وكانت حكومه !!
* يا كامل ادريس رئيس مجلس الوزراء الانتقالي بحكومه الامل بالسودان لقد طلبنا من ( سيادتكم ) حل مشكله ( سفر ) الكهرباء والمياه في السودان التي كانت من اخطر المشاكل وكان هنالك الانقطاع الكامل الشامل وفي كل الولايات وانت علي علم ومعرفه ان انتشار الانقطاع يساعد في تفشي امراض الملاريا والضنك وصار موجودا في كل شبر وقد تم انفصال الشركات والمصانع وزد علي ذلك ارتفاع الاسعار واغلاق المستشفيات والمدارس والجامعات وهلم جرا !!
* طيب يا كامل ادريس ( الريس ) بحكومه الامل بالسودان الذي حير ولفت نظر اهل العالم الخارجي والدول الخارجيه احتمال اهل السودان من تلك المشاكل والمحن وكيف يعيشون وسط ذلك الغلاء والتدمير وانقطاع الكهرباء والمياه الذي لا يصدق ؟!!
* كمان هنالك انتشار الامراض والغلاء في الاسعار وثم كان صبر اهل السودان وكمان مع كل الضغوط قالوا ان ارتفاع الدولار قد وصل السماء ووصل الي ما يقارب ( عشرالف جنيه سوداني ) ودا ما حصل في دوله بالخارج واهل السودان صابرون ووالله يا كامل ادريس انها اكبر الفضائح والتي لم تحصل في السودان من قبل !!
* يا كامل ادريس هل سمعت ان الجنيه السوداني كان يساوي 3.4 دولار في زمن الراحل ( جعفر نميري ) ؟!! * يا كامل ادريس اعمل حسابك من المظاهرات التي ربما يخطط لها ( فوبيا ) قحت القحاته وبغاث الطير وحنبر وحمله المباخر والروبيضه لان ارتفاع الدولار قد يؤدي الي التحركات وان الحياه المعيشيه ( ولعت ) وصار الغلاء في دائره السنتر. !!
* لقد سمعنا ان بعض الاصوات طالبت ابعاد كامل ادريس و( الفكي ) جبريل ابراهيم وزير الماليه وامنه ميرغني حسن مديره البنك المركزي بالسودان لانهم وراء الغليان وارتفاع الاسعار وهزيمه الجنيه السوداني !!
* ذكر الناس ان الثلاثي يمكن انقاذ ما يمكن انقاذه لان ارض السودان ( مليانه ) بالذهب والمعادن والبترول والغاز واليورينيم والسمسم والصمغ والقمح والمواشي. !!
* يا حكومه الامل ان اهل السودان تنتظر وتتوقع المزيد من الخدمات وكان علي حكومه الامل بالسودان العمل في الاصلاح العام ولكن ذلك لم يحصل وكان الصمت والسكوت ودوله السودان في طريقها الي ( الوحل ) الضخم والدرك الاسفل !!
* اخر الكلام هل يتفق معنا ( سعاده ) البروف كامل الطيب ادريس رئيس مجلس الوزراء الانتقالي بحكومه الامل بالسودان ان وجود ( المستقلين ) من ابناء الوطن السودان وفيهم العمالقه والعلماء والعباقره في الاقتصاد والهندسه والطب والعلم والتعلم والاعلام والصحافه وجماعه الاجنده اننا واهل السودان يعلمون انهم غير موجودين في ( خانات ) الوزراء والوزيرات رغم القله السهله الحساب والحسب فيها ؟!!
يا كامل ادريس هل انت تتابع ما نذكره وذكرناه من قبل ؟!!
طيب نعيد يا كامل ادريس هل علمت كيف استطاعت راوندا ان تصل الي القمه والتقدم والابداع. ؟!! هل ارسلت لمعرفه التفاصيل الدقيقه ؟!! هل تعلم ان تلك الدوله قد خاضت اكبر من حرب السودان وفقدت ( نصف مليون ) وبعدها وفي زمن قليل كان الاتفاق الذي حارب الفساد والانحلال ؟!!
استطاعت راوندا الافريقيه ان تنتصر علي سبل الحياه واصبحت راوندا هي المثال. !!
يا كامل ادريس ( الريس ) بحكومه الامل بالسودان ننصحك قبل اقاله وابعاد الوزراء والوزيرات ابحث قبلها عن المفيد الصالح الذي يخدم الوطن والتاريخ يسجل !! يا كامل ادريس ( الريس ) بحكومه الامل بالسودان نذكرك ( من قبيل. ) شن قلنا يا كامل ؟!!!
