صبري محمد علي (العيكورة) يكتب… لم اكن اتوقع البرهان بهذا الدهاء

لا اخفي انني كنت من المتشائمين والمحذرين من زيارة سعادة الفريق البرهان لمصر اليوم وقد اوردت مخاوفي وتوقعاتي ضمن مقالين متتاليين الامس واليوم.

وكلا المقالين كان قراءة لواقع تاريخ العلاقات المصرية السودانية التى لم يُوزن لها بلف منذ استقلال السودان وحتى يومنا هذا.

لذا حذرنا وحتى صباح هذا اليوم والتحذير كان من منطلق ان مصر لها دهاقنتها و فطاحلها ومجارمتها ومراكزها التي تخطط وترسم.

في مقابل رجل عسكري لم يمارس السياسة او حديث عهد بها فكنت اتوقع ان يسهل إبتلاعه بإعادة عقارب الساعة الي الوراء.

ولكن الرجل

(طلع ما ساهل)

كلمة السيد (بوبو)

جاءت متوازنه من رجل دولة على وجه صارم القسمات لخص ما يريد ان يرسلة لدول الاقليم والعالم الخارجي وللعملاء المتربصين بالسودان في (٤) دقائق و (١٥)ثانية.

فخامة الفريق …

(حفظهو الله وابقاهو)

ذحراً لهذا الوطن

شرح الحرب وابعادها الاقليمة والاطماع و عرج علي الانتهاكات والفظائع والدوافع واشار الي تمرد فئة لتستحوذ علي السلطة بالقوة.

فخامتو …

شكر من ساعد واستضاف السودانيين عموما وخص بالشكر مصر حكومة وشعبا.

الريس قال …

نحن كقوات مسلحة معنيون بقيادة فترة انتقالية تقود الشعب الي صناديق الاقتراع ليختار من يحكمة.

و اظن هنا سعادتو ….

قد اغلق الباب في وجه كل المتغزلين في شخصة وفي الجيش هذه الايام وفي وجه (ناس) عرمان والسنابل و الانتخابات ما بتجيبنا.

والله بعد ده (ياوهم)

إلا تغنوا للكرسي ….

كيف الرجوع لي زول قنع شايل رماد قلبوا الحرق.

سلك وعرمان وغيرو (game over) فهمتوت واللا اعيد.

الفريق (الله يطول عمرو).

نفى فرية و فزاعةظل يكررها كل من يتربص بالشعب السوداني (من غير ان يسميهم)
بان الجيش قد اصبح حاضنة للجماعات الاسلامية!

وارسل رسالة لكل اصدقاء السودان ان يفهموا ما يحدث بالسودان صحيحا من القيادة وليست من القنوات والاعلام المأجور مؤكدأ على قومية الجيش وبعده عن اي (ايدولوجيا) سياسية او عقدية.

مافي شك ….

ان احزاب قحت والسنابل وعواجيز الامة وصبيان الاتحاديين و ناس عرمان والبنشرجي ومعليش معلبش ما عندنا جيش وغيرهم وغيرهم.

قد بلعوا السفة مظبوووط الليلة !

اذاً يا جماعة والحق يقال
البرهان رجل المرحلة؟
ااي نعم

كراعو تقيله
ما مشكلة بتخف مع المشي

ثعلب؟
والله ياخي ما مشيت بعيد

يجيد الحفر والقنص
والعجب بالابرة والبندقية الالمانية

ياخ الزول ده بنشاف لي ميييت
والاسد برضو بعمل كده

والحكومة الجديدة؟
بغربلها ليك دقيق

تفتكر السودان عبر؟
مش كده وبس وقدل كمان

طيب لو إعتذر ؟
ما على كيفو بالتفويض الشعبي يحكمنا .

طيب وامريكا والغرب تفتكر (حا) يرضو؟
نشتري ليهو جزمة طوالي

موفق ياعمك
كيفتنا لكن (go a head)