عباس حديبة يكتب… فرحة كردفان.. عودة الروح والأمان!!

▪️ الفرحة الشفناها الليلة بدخول قواتنا المسلحة والقوات المساندة ما كانت مجرد احتفال عابر، دي كانت تنهيدة ارتياح من قلوب شافت الويل وصبرت على قهر المليشيا، ولقَت أخيراً سندها وضهرها.

الليلة آن الأوان لأهلنا في كردفان يختّوا راسهم وينوموا ملو جفونهم بأمان، وتبدأ الحياة ترجع ليهم خطوة بخطوة. الدرب قدامكم واضح ومجرب زي ما عادت العافية للجزيرة، والنيل الأبيض، والنيل الأزرق، ورفاعة، والفاو، والخرطوم، والدندر، وسنجة،

▪️ كردفان قادرة تقوم وتتعافى وتبقى أقوى مما كانت.

المرحلة الجاية دايرة مننا كلنا وقفة رجل واحد

اهمها اليقظة والمسؤولية

لازم نكون العين الساهرة والضهر الحامي، فالأمن اليوم ما مسؤولية الجيش والجهات الامنية فحسب… بل ده واجب كل زول فينا عشان نحفظ البلد ونصون ترابها.

• التعمير والنهضة علي ايدكم ما تعاينوا للحكومة ( الحكومة بالا واسع وطويل) إيد على إيد نبني ونعمر كل شبر خربته المليشيا، اعملوا القروبات الخدمية اشتروا الطاقات الشمسية للدوانكي واعملوا الصيانة للمدارس والمراكز الصحية وبأذن الله نرجّع لكردفان سيرتها الأولى وخيراتها.

التبلدي ،السمسم، الصمغ، الدخن،

قوة العزيمة يا اخوانا رأس مال

أهم شي نطوي صفحة الوجع ونقوي نفوسنا، ما في داعي للبكاء على الفات واهلنا قالوا “الضربة الما بتكسرك بتقويك”.

نبدأ نقطة وسطر جديد.. والجاي كله خير وأمان وعزة بإذن الله.