(كل الزوايا) عبدالرحمن دقش يكتب: ( اين (حبيبة عمري) و (رببع الدنيا) و (علي الجمال تغار منا) بشوارع الخرطوم)!!
* يا ( سعاده ) البروف كامل الطيب ادريس رئيس مجلس الوزراء الانتقالي بحكومه الامل بالسودان هل مررت بشوارع الخرطوم عاصمه الدوله في ذات يوم ولم تردد ( اخ .. تف ) ولم يحصل لك طراش ؟!!
* السؤال البسيط اين والي ولايه الخرطوم المكلف ( احمد عثمان حمزه ) وان حال الشوارع قد وصل الي تلك المراحل العجيبه والذي نراه بلا شك سوف يؤدي ذلك الوضع الي الامراض ؟! بعدين بيني وبينك يا والي الخرطوم ان في العاصمه الخرطوم سفراء واجانب من الدول العالميه وهم يشاهدون تلك الشوارع ( العفنه ) الوسخه بالزباله وكان الاجدر بذل الجهود لاظهار النظافه !!
* يا عثمان احمد حمزه والي ولايه الخرطوم المكلف هل تستطيع سماع ابرز معالم السودان من الروائع التي تهز جميع اهل السودان وهي ( حبيبه عمري وربيع الدنيا وعلي الجمال تغار منا ) رغم زحمه العمل والاعمال الشاقه ؟!!
* يا مستشار ( الريس ) كامل ادريس زميلنا الصحفي ( محمد محمد خير ) هل صاحبت كامل ادريس في اي شارع من شوارع الخرطوم ( المليانه ) بالقمامه والزباله ؟!! طيب تقول شنو لو قارنت شوارع الخرطوم بشوارع كندا التي قضيت فيها جل عمرك ؟!! عليك الله وضح له المقارنه حتي نمنع ( اخ .. توف ) واما رائحه الزباله فحدث عنها ولا حرج ويمكن تحكي تلك ( النضافه ) والحلاوه لرجل اسمه احمد عثمان حمزه وهو ( الوالي الكان في بالي ) وحقا هو والي ولايه الخرطوم المكلف. !!
* الحق يقال يا كامل ادريس رئيس مجلس الوزراء بحكومه الامل بالسودان وبصراحه ان انتشار الزباله في شوارع الخرطوم كلها وهي عاصمه السودان وبتلك الدرجه لا تشرف الدوله مهما كانت الاسباب !! * يا سعاده الريس لحكومه الامل هل تلك ( العفانه ) والقذاره والوسخ في شوارع الخرطوم تحتاج قدوم وزير الصحه الاتحاديه الدكتور ( هيثم محمد ابراهيم ) لفحص امراض الشوارع متلما يحدث في الملاريا والضنك ؟!! والله بعض اهل السودان قالوا عفانه شوارع الخرطوم هي التي ( خنقت ) الناس ومن ثم انتقلت الامراض الي الولايات الاخري !!
* يا كامل ادريس رئيس مجلس الوزراء الانتقالي بحكومه الامل بالسودان نطالب دعوه المدعو ( احمد عثمان حمزه ) والي ولايه الخرطوم المكلف وبحضور كل الوزراء والوزيرات وان يشرح لهم اسباب الزباله واغراضها وما الذي يغرب فيه لمحاربه الزباله !! المطلوب من الوزراء والوزيرات الحضور بالسيارات الفارهات ولكن عن طريق الشوارع التي تلبس ملابس القمامه والزباله وليس عن طريق الشوارع المخفيه وكلنا في الهم شرق !!
* بكل صدق نحن لا نتهم والي ولايه الخرطوم بالمتهم في اهمال محاربه الزباله واقول خبر قديم يا كامل ادريس ان الزباله منذ حكومه حمدوك الثانيه وكانت فظيعه وعمت القري والحضر وكان علي وزاره الماليه جبريل ابراهيم ( نفس المعاك الان ) وقد كان قد عمل ضريبه علي مواطن السودان في الزباله واصدر نشره ان تنضم النفايات والزباله الي فاتوره الكهرباء والمياه علي كل منزل في الخرطوم وكنت قد دفعتها مجبرا رغم التجوال والمشي في شوارع الزباله في حي من احياء الخرطوم بحري والذي تركته ان الروشته والفاتوره قد انتشرت وعلي عينك يا تاجر !! هل لا تزال تلك الفاتوره متواصله واهل الخرطوم يشاهدون الاكوام من الزباله قد اصبحت مثل ناطحات السحاب !!
* يا ( سعاده ) البروف كامل الطيب ادريس رئيس مجلس الوزراء بحكومه الامل بالسودان وبذمتك هل شاهدت في سويسرا شارعا واحدا فيه الزباله وثم ماذا كانت حاله الشوارع وهل تسمع حكايات الزباله هناك ؟!! * بصريح العباره ونحن في ارض المهجر ونار البعد والغربه وخلال جلوسنا في عده ولايات بامريكا عرفنا دقه العمل من الشركات المنظمه لحمل الزباله وكان هنالك تقسيم ايام الاسبوع علي انواع الزباله نفسها وهنالك فروقات بين بقايا الكرتون والاكل والحديد والزجاج وكلها بقايا ومنظمه عند الجمع !! * هل تعلم يا كامل ادريس اننا تكلمنا كثيرا جدا مع والي ولايه الخرطوم المكلف احمد عثمان حمزه وفي كتاباتنا في الصحف الالكترونيه عن الزباله وحال شوارع الخرطوم وهي عاصمه السودان ولكن يبدو انه وضع ما قلناه له في حزمه الزباله وانتهي الامر !! * لقد ذكرنا لوالي ولايه الخرطوم المكلف ( احمد عثمان حمزه ) ما حصل في دوله المانيا في محاربه الزباله والتي انعكس حالها واصبح وجودها قد ساعد في رفعه الاقتصاد ولكن بالنظم والقوانيين واصبح الدخل منه يدخل المليارات !! * لقد شرحنا ذلك لوالي ولايه الخرطوم المكلف احمد عثمان حمزه في اكثر من عمود ولكنه رمي بالاعمده في زباله المكتب ولم يراجع ما قلناه له وان سياده سفير المانيا ليس ببعيد عنه ويمكن ارسال وفد وطني لمعرفه ما حصل عن الزباله في المانيا !!
* المعروف ان المانيا كانت حريصه جدا علي ازاله الزباله والقمامه من الشوارع والمنازل ولكن بطرق تكنلوجيه وتولت الشركات ازاله القمامه وكونت المصانع المتطوره وصارت تلك المصانع تدخل الاموال من القمامه والزباله واصبحت الزباله تدخل الي المانيا والحكومه 100 من المليارات في العام !! * بالله يا كامل ادريس شوف ارتفاع الدخل جاء من وين ؟!! هنا استطاعت الشركات عمل المصانع من اجل محاربه الزباله واستطاعت المانيا هزيمه الزباله بل اصبحت المانيا تستورد الزباله من الدول المجاوره لها ومنها السويد والدنمارك. وايطاليا واصبحت تصنع من الزباله صناعات متنوعه منها الكراتين الجميله والصناديق والاورق الجميله للمسح والادوات الزجاجيه. !! لقد عملوا في الشوارع وامام المنازل اربع صناديق للجمع ومتنوعه ومكتوب عليها اسم الزباله. !!
* يا والي ولايه الخرطوم المكلف احمد عثمان حمزه اسمع كلامنا للمره الالف وسافر باكر الي المانيا ومعك جماعه التخصص واتفقوا مع المانيا التدخل وعمل ما عملوه ونفذوه عندهم في الخرطوم وتتم الموافقه بين الحكومتين الالمانيه والسودانيه وبها نجد المنفعه الماليه ونهزم الزباله وتصبح في الختام هي الحبيبه للسودان وسوف يحب اهل الخرطوم الزباله ومنها ندخل المليارات لحكومه الامل. !!
هل تصدق يا كامل ادريس ووالي ولايه الخرطوم احمد عثمان حمزه ان حكومه الامل سوف تستورد الزباله والقمامه من دول الجوار وهي فوق العدد وستكون الخرطوم سيده الزباله ومنها لن نسمع بوجود الزباله في الولايات السودانيه !! الذي افرحني انه بعد سيطره الزباله علي الامر اننا جميعا داخل وخارج السودان سوف نسمع بفرح حبيبه عمري وربيع الدنيا وعلي الجمال تغار منا بشوارع الخرطوم !!!
