(كل الزوايا) عبدالرحمن دقش يكتب ( بالمفتوح يا كامل ادريس… مارس الواقع في السودان !! )
* استحلفك بالله يا ( سعاده ) البروف كامل الطيب ادريس رئيس مجلس الوزراء الانتقالي بحكومه الامل بالسودان هل انت بتسمع كلام رجال السودان الحار حول حكومتك ؟!!
* هل تمشي لوحدك و( براك ) وتعاين هنا وهناك و( تشوف ) الكسر وتحاول العلاج وهل لاحظت ان العصا مكسوره ولمستها وذهبت بها الي العلاج *
يا كامل ادريس ( الريس ) بحكومه الامل هل بتذكر لما ( سيدي الرئيس ) الفريق اول ركن عبدالفتاح سلمك ( المركب ) في منتصف عام 2025م وقمت علي طول دون انتظار اختيار الوزراء والوزيرات وما راقبت ان ( القفات )كان فيها ( قدود) وشروط لا تعد وتحسب ؟!!
* طيب يا كامل ادريس لو كنت عاوز تشتري شويه طماطم وعجور ما بتخاف الضياع والقفف كلها ( اخرام ) ؟!!
* المعروف وبما يحصل من غلاء في الاسعار في زمن حكومه الامل لا يجد اهل السودان مجالا لشراء ( القفف ) وهل تعلم ان كيلو اللحم قد وصل رقم مرتب المعلم ؟!
هل شاهدت ( زول ) او ( زوله ) في الوطن الجريح شايل ( قفه ) ويقوم بشراء ( قطعه ) لحم واحذر من كلمه كيلو ؟!!
* من المؤكد جدا. يا كامل ادريس ان المعلمين والمعلمات. عاوزين يخلو شغل ( طاحونه ) الكراسات وسمعنا انهم لن يشتروا ( بالقفف ) المخرمه ولهذا كان عدم الحضور وهو عندهم بالدارجي ( قفه ) البيع والشراء لا يمكن دخولها الميدان ودا عند اهل الخارج والدول المتقدمه يسمونه ( الاضراب ) !!
* والله يا كامل ادريس رئيس مجلس الوزراء الانتقالي بحكومه الامل بالسودان في الذي سمعناه في الوطن نخاف عليك عندما تسمع ان احد رجال السودان وهو يحمل شهاده عليا وبالظبط مثل شهادتك وهي البروف ان تصل الي تلك المرحله !!
* عارف يا كامل البروف داك لما ( انزنق ) من قله المرتب ولم يتردد وعمل ( طاوله ) بيع الخضروات!! هل تتفق معنا يا كامل ادريس ( الريس ) بحكومه الامل ان ذلك البروف يدرس ويحاضر ملفات البيع والشراء في سوق البصل وسيبك من الجامعه !!
* طيب يا ( سعاده ) رئيس مجلس الوزراء بحكومه الامل بالسودان ان كانت الحكايات عن غلاء الاسعار في السودان في كل الحاجات في الاسواق فماذا يا كامل ادريس عن الكهرباءو( المويه ) والتي تنقطع ثلاث اربع ايام ولكن في بيت ( الريس ) والوزراء والوزيرات فلا انقطاع لدقيقه واحده ولكن اهل السودان وفي كل الولايات تبكي وتمرض من هروب الكهرباء والمويه وانت ما واقف معاهم وقلوب اهل البلد تمزقت وانحرقت !!
* بصراحه يا ( الريس ) كامل ادريس ان السودان حقو يشيلو منه كلمه ( دوله ) ويسمي ( بلد ) لان وضع السودان المرير دا لا يتساوي مع دول اوروبا وافريقيا واسيا الذين يحملون ( دوله كذا ) !!
* عليك الله يا كامل ادريس فتح عينيك كويس وشوف الحاصل شنو وما هو العلاج وماذا يحتاج السودان ( المحطم ) المكسر المبهدل ؟!!
يلا يا كامل ادريس وعشان كدا استعد وخليك معانا وطلع اللبس الافرنجي والبس ( العراقي والسروال ) !!
* يا كامل ادريس رئيس مجلس الوزراء الانتقالي بحكومه الامل بالسودان. نخلي الكلام عن اعمال الوزارات والوزراء والوزيرات.
ونترك الاشاره الي المدارس والجامعات والصحه وامراض الملاريا والضنك وعدم وجود وغلاء الادويه والمستشفيات والكهرباء والمياه المقطوعه وغلاء الاسعار. واللحم والماشيه والزراعه والاهمال والمعادن والذهب والتهريب والتجاره والحاله الاجتماعيه والشباب والرياضه والخارجيه واما الداخليه فحدث عنها ولا حرج !!
* بالامانه كل الوزارات في خانه ( الزيرو ) و( الريس ) اخر من يعلم ودعنا اليوم نتكلم عن وزاره الداخليه !!
* لا يمكن يا كامل ادريس ( الريس ) ينعدم الامن تماما من السودان ولا يمكن ان نصدق ان الامن مستتب وتتكاثر دعوات النازحين ان البلد تمام وان الامن هو الاقوي ولا تخافوا !!
* طيب يا كامل ادريس ماذا تعني تلك الواقعه الخطيره جدا في جنوب ام درمان وفي منطقه الصالحه ان يتم اغتيال شرطي ( عديل ) وعلنا وهنا اين الامن لرجال الامن ؟!
بعد دا تقولوا مرحبا بالنازحين وتطالبوا بالرجوع الي السودان !!
* اسمع يا ( سعاده ) البروف الريس كامل ادريس اين الامن عندما تم دمار شامل لانظمه الطاقه الشمسيه لايقاف الكهرباء ودا نفذه وقام به الحراميه وتسعه طويله وعلي عينك يا تاجر ؟!!
* لا شك في ذلك ان الامن في السودان عايش في خانه الانحلال !! لو عملت الحكومه نظام المحاكمات مثل ما عملته دوله اريتريا لن نجد ضعف الامن وبلاش محاكمات وهميه وكان بعد الحرب تدخل الحكومه محاكمات الشوارع والقتل امام الشعب وبعدها سوف ينام الامن علي الحرير ولن نسمع بالاغتيالات حتي لو في الخلاء وسوف نسمع بالامن والامان ولن نسمع تسعه طويله بالليل والنهار !!
* الحل عندنا الي قمه الوطن والنهضه ولقد تحدثنا معك وكتبنا اليك يا كامل ادريس وانت ( الريس ) بحكومه الامل وقد فترنا من الكلام معك لمرات عديده وقلنا مرارا وتكرارا ان تقوم بارسال بعض الوزراء والوزيرات الي سنقافوره وراوندا لمعرفه اصول القمه والتقدم وقد تم خلال سنوات بعدد اصابع اليد الواحده في الانسان وبعدها اصبحت تلك الدول من اعظم واقوي واغني دول العالم وتم كل ذلك بسرعه الصاروخ وسوف يعلمون الاشياء الاخري التي ترفع الي الثريا !!
* بكل صدق ان الذي نجده في السودان لم يكن موجودا في تلك الدول التي طارت الي السماء !!
* نطالب الريس كامل ادريس رئيس مجلس الوزراء الانتقالي بحكومه الامل بالسودان ان تكون نوعيه الوزراء والوزيرات مختاره للذهاب بدقه وجداره حتي ننفذ فورا وخاصه ان السودان تتوفر فيه كل المدخرات وموجوده علي اراضيه ولكن ينقصها الاستخراج !!
* يا حكام السودان ان اول ما يحسم وينفذ لن يجد صعوبه لان ارض السودان فيها كل الموارد !!
بالله عليك يا كامل ادريس سارعوا في ( ردم ) البترول والغاز والمعادن والذهب وعالجوا مشاكل الكهرباء والمياه اليوم وليس غدا وكذلك انشاء الشوارع الاسفلتيه !!
علي حكام السودان نسيان النفس ولو لعام واحد وبعدها سوف نصل الي مرتبه ما وصلت اليه سنقافوره وراوندا وشوف الكلام يا كامل ادريس بكره !!!
