عباس حديبة يكتب…. هضربة ضنك!!

ترمب (ابو دليبة).. هو يا عزيزي مفتكر حكاية الحرب مع ايران شغل عادي وخلاص.

و حتي كمان اقنع جماعتو المعاه بأن الموضوع دا بسيط ونخلص..

قام حرّك بوارجو، وغواصاتو، وحاملات طياراتو، ودقش البحر..

يا جماعة الراجل تاجر وكمان بلطجي. وزول عواميل بشهادة ودي شغلتو البعرفها.

اها وصل الميس تب. ومفتكر ايران ح تقول ليه النبي فوقي.

لكن ايران وجدت الدعم المعنوي من حزب الله لبنان، والشباب العراقي، والحوثي من اليمن، وبعض الدول سراً..

وهنا ترمب رأس مالو في الحرابة دي شوية حديد وقطع بحرية واجهزة تشويش..

ومدفوعة الاجر من اجل الحماية لدول الخليج وكل من يحتاج لهذه الخدمة..

يعني بالواضح كدا هو عامل شركة امنية كبيرة حامية الدول اللي مافاضية للمشاكل وكدا.

اها قامت (الكائنة) وقام هبش الفرس ديل بشوية استفزازات.. وطبعاً هو الزول دا قالوا كان بتاع مصارعة.. وناس المصارعة حركات الاستفزاز دي عندهم كتيرة خلاص..

ايران ما كضبت شتتت صواريخها زي السماية.. ودوا لي ديلاك كوم وناس فلانة ماتنسوهم والداية كراع والرأس للضباح وهكذا..

وكمان البنية الصغنونة المدلله الشعيتة (اسراشيل) اغتالت الصف الاول من الحكومة الايرانية بالمرشد الايراني ذاتو ..

وهسع بقت تولول ورئيسها اختلفت حوله الروايات.. وغاااايتو…

هنا بقي زاد من الاحتقان الداخلي لايران..

وحتي المعارضة الايرانية اصيبت ببرود. وشوية خجل، ايوا الفرس بخجلوا والله جد. ما زي ناس سلك، و وجدي صالح، وحمدوك، ومنقة.. الفرس ناس رجال فيهم النخوة والشهامة وعندهم عرض وطول ذاتو ..

هسع ترمب عاوز التفاوض.. ورادخ. لكن الناس الجدد في الصف الثاني اللي مسكوا بعد الصف الاول سياسة المرونة ماعندهم زي الاستاذ الجديد لازم يبدي صرامته..

والناس جداد في الشغلة ومتحمسين وعندهم ثأر لجيل سياسي كامل وهنا (اب دليبة) مفتكر الشغلة زي حرب ال 12 يوم ديييك..

بس بذكرني بشافع فتح ماسورة وغلبتو يسدها..

تملاه موية وتبشتنو..

ترمب اول 3 طيارات قامن من الكويت قالوا ضربوهن براهم.. وحكمة الله الطيارين نزلوا شداد لا طق لا شق…

اها دا بقي الفيلم

الزول دا اذا الحرب انتهت بأعوج ولا عديل عاوز حساباتو في الخسائر.. الراجل شركة امنية اوماال القواعد دي عشان يحمي بيها شنو في امريكا؟

المهم الحاضر يحدث الغائب الزول دا لو انقطعت فردة شبشب هو ح يحاسب بيها. ودا اسمو القلع بالقانون..

علي العموم البشير كان مفتح.. قدر ما دارجوه عشان يعملوا قاعدة في السودان قااال (ماااام)

هسع كان اكون عندنا اكبر نصيب من الصواريخ دي..

وكمان ح يرسلوا لينا الصواريخ القديمة ومسوسة..

(اب دليبة) ماعندو مصلحة في ايران تنتهي… مافي صناعي بكسر عدة شغلو.. ايران استثمار ليه وعاملها فزاعة يلقط بيها رزقه..

لذلك نبقي في الليلتنا ونقول ربنا احفظ المسلمين والابرياء

قوموا الي سودانكم

*الوجعــــــلل*

✒️ عباس حديبة