صبري محمد علي (العيكورة) يكتب… صحن الفول وَصَل!!

أذكر ذات مرة كُنتُ في مغسلة سيارات بمدينة المناقل وقد نصحوني أن أذهب باكراً لأن اليوم الذي سبقه كا ممطراً لتفادي الزحمة و بالفعل وجدتُ أمامي آخرين

وأذكر أن (دوري) جاء
(وكت فطور) كما يُقال وظللتُ مُنتظراً و عمال المغسلة قد بدأوا في سيارتي
جلست علي (عنقريب) وضعوه للزبائن أتصفح (الموبايل)

(فجأتن)…..
إذا بجميع من بالمغسلة يلقي ما في يده و يهرول مُسرعاً ناحية غرفة صغيرة !!!
سألت بدهشة
الحاصل شنو يا جماعة
فقيل لي
الفطور
الفطور
صحن الفول جاء !

ولعلهم يعلمون جيداً هذه (الوثبة) إن لم تنجح في إدراكها فلا تلومن إلا نفسك

*(الموضوع ده ذكرني)*
بأخوانّا أردول ومناوي مع قمة أديس بالأمس
يا جماعة الناس ديل مشوا وين؟
قال ليك و الله
صحن الفول وصل!

الصورة (المتداولة) أعلاه إن صح النشر تقول إن (المستر) مناوي إلتقي ب (المستر) حمدوك بالأمس على (هامش) قمة صحن الفول باديس أبابا
(حلوة هامش دي مُش كده)
يا مناوي
يا أردول
يا عمك جبريل
يا مُش عارف مين
من شركاء الحكم بالسودان
يا جماعة …..
خلُّو عندكم شوية مبدأ
يا جماعة
الجري وراء كل (صحن فتّة) ده ما ببقى

إنتو حكومة أحترموا الحكومة ولو لمرّة
حمدوك شنو (يا مارشال)

مُش معنى إن قواتكم تقاتل تحت إمرة الجيش
تمشوا (تقدِّوُها بي هناك)

أرجلوا شوية يا جماعة
وخلوا عندكم عزة نفس شوية
مُش كل واحد
(شدّا ليهو حلّة)
طابقين رغيفكم و جاريين عليهو !!

*صحن أمس و إنتهى جهزوا حالكم لصحن الفول الجايي إذا بتريدوا*

ناس (طوااالي شايته) فوق العارضة معقول ياخ !!

الجمعة ٥/يونيو/٢٠٢٦م