د. أحمد منصور المحامي يكتب… «البرهان جاااب آخره عديل كده»
يا ناس الله التداول السلمى ده ما ياهو عبر الإنتخابات ولا غيرووو …
قالوا دايرين الديمقراطية والديمقراطية دربها واضح ومعروف …
إلا كان ناس بنى قحيط قاصدين ديمقراطية جديدة على السياسة والسياسيين طبعا هى من النوع (الدقلاوى) اللى بتجي بى البندقية واليد القوية …
وده كله عشان القحاطة ديل قبيل جربوا ديمقراطية المظاهرات وتتريس البلاد واستلموا السلطة برقم قلتهم القليلة جداً …
وهى ديمقراطية من نوع الحكومة دى حقتنا ونحن الوحيدين اللى من حقنا نتظاهر ضدها ولا يجوز لأحد غيرنا أن يتظاهر فهذا ممنوع (من أقوال سيدنا فكى منقة) …
التداول السلمى للسلطة لا يكون إلا عبر إنتخابات حرة ونزيهة يختار فيها الشعب السودانى من يمثله فى البرلمان ومن يحكمه فى الرئاسة …
وماسوى ذلك ما هى إلا أوهام قحاطية ممن يدعون المدنية ويتشدقون بها عبر القنوات الفضائية …
كل مرة يغيروا لينا فى جلودهم بى حاجة جديدة وبى ظهور جديد والوجوه طبعا هى هى لا بتتغير ولا بتتبدل وآخرها مبادرة حبوبة عشة قائدة ورائدة إطلاق عتاد المساجين المجرمين من السجون لنهب وسرقة المواطنين …
وجايبه لينا معاها صاحبنا الكان مكتئ عليه مدنى جرادل عندما تم هتك وتقطيع قميصه المشهور فى فض الإعتصام …
… أخيـــــرا …
البرهان جاااب آخره عديل كده …
وختاها للقحاطة (المدنيين كما يسمون أنفسهم) واااطة …
وقال الكلام الما بيعجب عشاق المدنية والديمقراطية بتاعة اللف والدوران قال للبى بى سى :
لا مجال لحكم السودان من قبل أى مجموعة مدنية إلا عن طريق صندوق الإنتخابات …
وسنقوم بتعيين حكومة تصريف أعمال تراعى معاش الناس وتسهل لهم الخدمات …
بالله عليكم يا قحاطة الكلام ده جميل ولا ما جميل ؟؟؟
و بيعجب ولا ما بيعجب ؟؟؟
ودى الديمقراطية الحقيقية المطلوبة لكل الأحزاب السودانية …
معليش أنا نسيت إنو إنتو يا أحزاب الحرية والتغيير عارفين وضعكم ومقدراتكم وعارفين البير وغطاه …
وطبعا من ناحية القواعد قواعدكم صفر ولن تستطيعوا بهذا القدر الضئيل خوض أى إنتخابات عربيتين لييييه ؟
لأنكم الحاضنة السياسية للدعامة والتى نهبت وسرقت وأغتصبت المواطنين السودانيين الذين سيختارون من يحكمهم عبر صناديق الإقتراع …
وبى كده يا بنى قحيط تكونوا قبيل قبل الحرب ما لعبتوها صاااح …
قةنا ليكم ده البرهان ملك الطلس والتوهان …
وهو الذى لا يخشى إنس ولا جآن فقط يخشى الخالق الرحمن …
وطبعا هو الذى كسح ومسح وسحق ومحق جيش الضكران الخوف الكيزان …
ودمر عرش بنى قحطان …
غايتووو …
الأطفال زمان كانوا بيخوفوهم بالبعاتى وود أم بعلوا والمرفعين …
والقحاطة قالوا بقو يخوفوهم بالإنتخابات وصناديق الإقتراع …
قالوا هم ناس المدنياااو والديمقراطياااو …
طيب يا ناس دى تتفهم كيفن …
