دار السلام المغاربة… اهل الوفاء والعطاء!!
الظهيرة – ابتسام ابو طاهر الخليفة:
دعاء برعي.. كانت نعم النشأة والتربية في كنف امها (طاهرة الطاهرة) وابيها برعي الرجل الطيب الودود.. واليوم كانت فرحتنا بزفافها إلى وجيه الوجهاء.. ونقول لهم مبرووووك ان شاء الله بيت مال وعيال.. جئناها من عطبرة.. امل وخطيب وياسر واسلام وصالح والشبل عمر.. لان عشرتنا مع (طاهرة الطاهرة الوفية السخية الكريمة الهميمة العفيفة اللطيفة) عشرة سنين..
ولو حدثتكم عن (ستنا خلف الله ) (شايلة اسمها بحق وحقيقة.. والكلام كمل) تخدمك حافية.. بالنية الصافية.. فاهمة وعالمة.. وكلامها كله نصائح ودرر.. ولو حدثتكم عن (مي محمد احمد ) (كمان دي حفظت حاجات بيتي) الله يحفظها ويحفظ اسرتها كلها من كل شر.. وجيراني كلهم وانا غايبة ما شاء الله حرسوا بيتي الطلعت منو من تاني يوم للحرب..
ولسع ما رجعت.. انتو يا ناس دار السلام المغاربة عزلوكم عزل من بين الناس وجابوكم المغاربة.. اصيلين ما فيكم كلام.. وراجعين ليكم باذن الله.. نفوتكم وين؟
