(خمة نفس) عبدالوهاب السنجك يكتب: لو كنت الوالي!!
ليكم طااخ… من دون لف ولا دوران، وبدون مجاملات ودغمسة.
لو كنت الوالي.. أول حاجة:
ضرب الفساد ومحاسبة المفسدين: ما في أمن ولا تعليم ولا صحة بدون نضافة. أول قرار: ملفات الفساد القديمة تتفتح كلها. الزول البلع قروش المدارس، ونهب قروش الدواء، وبدد قروش الولاية… يتحاسب قدام الناس. لا كبير على القانون، ولا حصانة لزول سرق عرق المواطن. نعمل نيابة جرائم مال عام خاصة بالولاية، شغلها ليل نهار. المال العام ما مال الجميع.
2. الأمن:
. أمان المواطن خط أحمر. الشارع الآمن، والسوق الآمن، والمدرسة الآمنة. العسكري يحرس المواطن ما يرهبه. ما في تنمية بدون أمن.
3. معاش الناس:
المرتب البكفي 15 يوم ده إهانة. أخليه يكفي الشهر ويفيض. المعلم، الممرض، عامل النظافة، المعاشي الأفنى شبابه خدمة للمواطنين… ديل أول ناس في عيني. مرتب مجزي.. علاج.. سكن محترم.. احترام.
4. المعلم والتربية والتعليم:
المدرسة الحكومية أولوية قصوى. نوقف مهزلة تصاديق المدارس الخاصة الاستثمارية. نرجع هيبة الأستاذ، نديه حقه، ونأهل خريجين التربية. نفتح مدارس حرفية، صناعية، زراعية… نطلع زول منتج ما حافظ ساي.
5. الممرض والصحة: المستشفى الحكومي يرجع زي زمان. دواء متوفر، سرير نضيف، ممرض ما مضغوط. الصحة حق، ما واسطة.
6. عامل النظافة والمعاشيين:
الكنس الشارع 30 سنة، والدرّس 40 سنة… ديل تاج الراس. معاش محترم يصرفوه أول ناس، وكرامة قبل القروش.
7. الاستثمار والتخطيط والمالية:
قروش الولاية للولاية. مشاريع إنتاجية، زراعة، صناعة صغيرة. نخط للمستقبل ما نرقع بجبايات.
8.تفكيك المجلس الأعلى للبيئة:
ندرجه بوزارة الصحة طوالي. عايزين عربات نفايات شغالة، ما مكاتب فخمة ولا مصاريف وايجار عقارات في الفاضي.
9. ضم الثقافة والإعلام والشباب والرياضة:
وزارة واحدة قوية. الشباب طاقة، والثقافة هوية، والإعلام صوت.
وأسأل المسؤولين سؤالين مباشرات:
1. سؤال المعلم الجيعان:
كيف داير طالب ينجح في 70 يوم “مضغوط”، وأستاذه ما صرف حقوقه؟ فاقد الشيء بيعطيه كيف؟
2. سؤال ولي الأمر الحيران :
ولدك قعد في الأرض 3 سنة حرب، وهسي داير تسجله في فصل فيهو 100 طالب قبل النتيجة تطلع… ده تعليم ولا يانصيب؟
والكلمة الأخيرة:
الوطن البتبنيهو بيد، بهدوهو بيد الفساد. لو ما قطعنا يد الحرامي، عمرنا ما حنبني. الكرسي ما دايم، والتاريخ ما بنسى.
(خمة نفس)
لو كنت الوالي لوضعت عمامة الحجاج بن يوسف على رأسي قناعا ودخلت سوق الله أكبر وشفت وسمعت كلااام الناس.. عن الحكومة..
لكن اقول ليكم بملئ فمي.. أنشأ الله ما ابقى مسئول لمن اموت.. دا وجع زي الوجع.. خلونا على كداا.. بس نخم نفسنا فيهم خم ماهم خامين نفس المواطن الغلبان.
(خمة نفس)
شعب واحد.. جيش واحد.
