مقالات الظهيرة

(من الحياة) إبتسام أبو طاهر الخليفة تكتب… شرق النيل.. بلد البركة والكرم والإعمار !!

ما شاء الله تبارك الله.. لو داير تعرف معنى الكرم والطيبة والأصالة، أمشي شرق النيل.

أنا شفت بعيني.. وعشت بينهم.. إنسان شرق النيل ده إنسان مختلف.. زول كريم بالفطرة، طيب القلب، بشوش الوش، بيتو مفتوح قبل بابو..

والحلو في شرق النيل إنو الأغلبية أهل.. كلهم أهل بعض.. أخوان وأولاد خالات وعمات وجيران عشرة عمر.. وحتى الزول الجا من برة شرق النيل، لو سكن بينهم يومين، ببقى واحد منهم.. يضيفوهو معاهم ويبقى زيهم.. ما شاء الله تبارك الله.. دي المحرية فيهم ❤️

*شرق النيل اليوم.. نموذج للسودان البنحلم بيهو*

والله حاجة تشرح القلب.. وسط الحرب والوجع الحاصل في الخرطوم كلها..

*الكهرباء مستقرة في شرق النيل*

*الموية موجودة*

*الخدمات شغالة*

*الناس بتبني وبتعمر*

ما شاء الله تقول كأنو الحرب ما جاتهم.. ليه؟

لأنها بلد بركة.. بلد متدينة.. بلد المساجد والشيوخ والخلاوي.. بلد القرآن..

ما تمشي شارعين إلا وتلقى مسجد، وتلقى صوت شيخ بقرا، وتلقى زاوية بتحفظ القرآن..

البركة الفي شرق النيل دي من دينهم ومن خوفهم من الله ومن كرمهم..

*وأنا بقولها بالفم المليان:*

*إعمار الخرطوم يبدأ من شرق النيل*

لو دايرين نعمر الخرطوم صح، نبدأ من شرق النيل.. نتعلم منهم كيف الناس تبقى يد واحدة، وكيف الجار يقيف مع جاره، وكيف البلد تتعمر بالناس ما بالحكومة بس.

شرق النيل الليلة بتعمر جد جد.. بيوت بتتبني، دكاكين بتتفتح، مدارس شغالة، حياة ماشة.. لأنهم ناس متوكلين على الله ومتكاتفين مع بعض.

تحية من القلب لكل أهلنا في شرق النيل..

تحية لناس المغاربة و*الحاج يوسف، وحلة كوكو، والجريف شرق، وأم دوم، والفيحاء، والمايقوما، والوادي الأخضر..* وكل قرى وحلال شرق النيل العامرة..

ربنا يحفظكم ويزيدكم من نعيمو، ويحفظ بلدكم من كل شر، ويجعل البركة الفيكم تعم كل السودان يا رب..

وشكراً يا شرق النيل.. علمتينا يعني شنو كرم ويعني شنو جيرة ويعني شنو بركة..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى