(خمة نفس) عبدالوهاب السنجك يكتب : نقطة… نقطة

(نقطة أولى)

إدارة مشروع الجزيرة أمام تحد كبير بعد أيلولة الري، بقرار من رئيس مجلس الوزراء في الأول من نوفمبر من هذا العام، فهي تستقبل الموسم الشتوي كالذي يحمل فأسا يريد به إزالة جبل شامخ ” الاطماء الحشائش” و(103) ألية وسط المشروع، إدارة الري بوزارة الزراعة ما عليها الا بحصاد المياة بخزان سنار وهي تقول “اتفكينا منك ياشبير” وما علينا حاجة تاني.. قولوا حاجتكم كم من الموية نفتح ليكم طوالي..ونحنا معاكم يدنا بيدكم.

 

(نقطة ثانية).

في ولاية الجزيرة، مدراء عامين يتقلدون مناصب وزراء وزارات، ووزارات من دون مدراء عامين، واخر ماسك كل حاجة والثاني مش عارف حاجة، وديل يسمونهم وزراء وهم مش وزراء، ووزراء مفوضين وهم مش مفوضين وديلك مكلفين وهم مدراء عامين.. انتوا فاهمين حاجة ياجماعة “الخير” لأن انا مش فاهم حاجة..

 

(نقطة ثالثة)

مدرسة الأمل (4).. طريق البحوث الزراعية أطفال أجسادهم رهيفة ترتجف من البرد، المباني لا باب ولا شباك حتى المدرسة من دون سور.. ليه كدا بس ياحكومة ولاية ولاية الجزيرة ديل ما أولادكم، والا هم عشان من ذوي الحاجات الخاصة”صم” ما عندهم وجيع، اتقوا الله فيهم، واسع دا كلمناكم، والله علينا بشاهد وعالم بذلك.

 

(نقطة رابعة)

شارع الدكاترة بودمدني، حكايات تعرض على مسرح الوجع، غياب تام لمواصفات العيادات الخاصة.. لافتات يكتب عليها مؤهلات وعلم الدكتور تقول “القبة فيها فكي” مباني قديمة ورثات الأجداد،. فهي لا تصلح أن تكون عيادة لاستقبال المرضى، اما تلك العمارات الشامخة والاسم اللامع الكبير، هو العذاب بذاتو.. الطابق الثالث والمريض يحمل على الأكتاف مافيش سلم كهربائي ولا حتى سلم مزلق، واخر ابتكار لسرقة جيوب الزائرين “التذكرة” الف جنية.. ولو ما تدفع ما تشوف المريض،.. والله دا مستوصف خاص وأهل المريض دافعين التأمين “حق الغرفة وزيارة الطبيب” وكل حاجة على أهل المريض،، يقولوا ليك لازم تدفع حق تذكرة، سرقة جيب في وضح النهار، من المسئول ياوزارة الصحة.

 

(نقطة خامسة)

ودمدني عاصمة ولاية الجزيرة ماشاء الله عليها زحمة زي الزحمة… وبالأخص الركشات والتكاتك… ولكن من دون ضوابط تذكر.. حتى الركشات كان في السابق عليها أرقام كبيرة مسجلة بإدارة المباحث، اسع دا.. مافي حاجة كان نسيت ليك غرض في ركشة الا يكون الجوكي ود حلال يجيبا ليك غير كدا الله يعوضك.

نقول لإدارة الشرطة.. يجب المراجعة والأرقام على جنبات الركشات مهمة جدا، والجريمة تطورت وتقدمت.. ورايكم شنو سادتي.

 

(خمة نفس)

المليشيا المتمردة في كماشة، المحاور مولعة نار.. المسيرات الاستراتيجية شغالة شغل الجن، اهاااا تاني شنو، احسن تعردوا ساااااكت تقولوا الرووب،. انتوا وناس سلك وخيط وزيط ومعيط ما حا تحكمونا مادام فينا روح.. روحوا كدا ولا كدا، الله لا يديكم بركة.

(شعب واحد..جيش واحد)