صبري محمد علي (العيكورة) يكتب…. حسابات بنكية مشبوهة و (ضربُو يا حكم)

خطاب بنك السودان الصادر بالأمس لكافة المصارف بحجز حسابات وتجمد أرصدة (٣٩) قحّاطياً و قحّاطية على ذمة بلاغ رقم (كيت كيت كيت) والمبني على خطاب اللجنة الوطنية للتحقيق في جرائم القانون الوطني والقانون الدولي والإنساني والصادر للبنك بتاريخ (١٩) من أكتوبر الجاري

*يعني الكلام جديد (بنات أعمُو ما سِمعن بيهو)!*

 

أعتقد …..

ما زال هذا (الموضوع) موضوع نيابة وقضاء ولا يحق لنا تناوله في غير هذه الزاوية

 

لكن ….

(تخيّل معاي يا مؤمن)

لو أن قائمة التسعة وثلاثين قحاطياً هذه كانت لإسلاميين مثلاً …!

فماذا كان سيفعل القحاطة هذه الليلة والليالي التي تليها

بالله هل كانوا ….!

(سيتركون صفيحة ما يدُقوها)؟

 

وبالباطل و (الكضب) وعينك عينك

وأظنكم تتذكرون فرية ال (٦٤) مليار دولار التى قالوا إن الكيزان أودعوها بنوك ب (ماليزيا) وقوائم الشرفاء الأخرى التي حاولوا إلصاق تهمة السرقة والإختلاس بهم .

 

(فااااا) …..

حالياً نحن في إنتظار (طرف الخيط) غايتو!

(لي دق الصفايح)

 

آآي نعم الموضوع ما زال بيد النيابة والقضاء واللجنة الوطنية

لكن كمان و الله

(الشمار الطاعم ما بناباهو)

 

الجماعة ديل عملوا شنو؟

و(لغفو) كم؟

وبالدولار و(اللاّ) باليورو

وسفسفوه كيفن؟

بالقطاعي واللاً بالجُملة

ومدراء مكاتبهم والمحامين الإشتغلوا شغلانة الإيداع وإدارة الحسابات

الناس ديل وين؟

شتتوا؟

واللأ ما زالوا لابدين جوة البلد دي؟

 

و(حقنا ده) ….

لحقو سحبوه واللأّ فيهو باقي قريشات ؟

 

والإنتفاخ ده كان متين؟

عشان نربط الوقائع يا جماعة

أيام لجنة (وجدي شاسات)؟

واللاّ أيام بلع المزارع والمنازل ومصادرتها

واللاّ كمان …..!

أيام توزيع عربات منظمة الدعوة الإسلامية!

 

والبلع ده زاتو (ياربي) تم تحويلة لأملاك وعقارات بأسماء الأقارب والزوجات (الصالحات) والأطفال في محاولات تموية مفضوحة

أم أن (الكاش) ما زال كاشاً تمهيداً لتهريبة لخارج السودان

 

بنك السودان طالب البنوك بالإفادة خلال يومي عمل مما يعني أن الأحد القادم يُفترض أن يكتمل فيه حصر منهوباتنا (الكاش) !

 

على كُلِّ حال شخصياً …..

غير مُتجعل ل (دق الصفايح) كما فعلوا هم سابقاً و سننتظر التسريبات ولن نعدمها حتى إذا ما ……

(دقينا الصفايح دقّيناها بي فهم وبي خلفة الكُراع) !!

 

ولا أذيعكم سراً قرائي الأعزاء إذا قلت لكم إن

قمّة سعادتي في (حاجتين)

(بل) القحّاطة

(وااااا) ……

كوارع الضأن

 

*و(العجب بالليمون*

*والجمبة الفيها الحديدة)*

 

 

 

الخميس ٢٣/أكتوبر/٢٠٢٥م