سلوى احمد موية تكتب… عين الخريف!!

الخريف فصل من فصول السنة الأربعة في المناطق المعتدلة يقع بين موسمين يسبقه( حار) فصل الصيف وبجي بعده (بارد) فصل الشتاء توجد عدة تعاريف لفصل الخريف، منها ما هو فلكي (بداية الاعتدال الخريفي)، مناخي («نصف فصل» بين الفصل الحار والفصل البارد) وتقويمي (حيث تختلف التواريخ حسب البلدان). ويمتد هذا الفصل في نصف الأرض الشمالي من أواخر الربع الثالث إلى قرب نهاية الربع الأخير، أما في نصف الكرة الجنوبي، فهو يبدأ مع نهاية الربع الأول ويمتد حتى أواخر الربع الثاني.

يتميز الخريف بهبوط ملحوظ في درجات الحرارة، فيه تصبح السماء غيمة وريحة الدعاش والمطر، وأحيانا نزول( البرد) الثلج في أواخر الفصل. ورغم ذلك قد تكون الأجواء صافية ومشمسة خصوصاً في أوائل الفصل

عين الخريف تبدأ بوادره بنزول عينة الثريا (التريا) بتكون غالبآ في بداية شهر خمسة او ستة في بعض المناطق وفيها يبدأ المزارع بنضافة ارضه و(الرميل) رمي البذور وانتظار نزول المطر . كل عينة مدتا ١٣ يوم الا عينة (الجبهة)ودي مدتا ١٤ يوم بعدا التريا بتجي عينة( العصا العطشانة) وهنا بتحول مسار واتجاه الرياح من الشمال الشرقي الي الجنوب الغربي وبتكتر فيها الكتاحة والعجاج(السفاية) الغبار الناعم وبتستمر ١٣ يوم وبتفاوت نزول المطر فيها بين غزير وخفيف من منطقة ل التانية. العينة التالتة عينة( العصا الرويانة) بتبدأ غالبآ في أواخر شهر ستة لحدي يوم بداية شهر سبعة والجو فيها بكون معتدل ومايل للبرودة وبتقل رغبة الإنسان في شراب الموية. بعدا بتجي عينة (الضراع ) زراع الأسد القوي الذي يبطش به صيده. تتميز بداية عينة الضراع بالمطر المتواصل فيه تهب الرياح من جهة الجنوب الغربي لتكون السحب الماطرة التي تبدأ في الهطول وان صحت العينة يكون بشارة خير لنجاح الخريف والموسم الزراعي والخير الوفير المزارعين بقولوا عن عينة الضراع(لو صح الضراع خريف. ولو فشل صيف) فيه تخضر الأشجار وينبت الزرع والأعشاب فيها برق شديد ورعد مدوي فيها قال الشاعر عبدالله حمد ود شوراني

دعاش برق الضراع ألفي السحابة يلاوي

جاب لي ريحة من اللي اذايا بتداوي

كان ما الحب صعب من الكبار وبلاوي

مافيش داعي بعد الشيب اكون لها راوي.

بعدا بتجي عينة (النترة) وتعني زئير الأسد المخيف تكثر فيه الآفات مثل الطير وجداد الوادي والصبرة والباحوت والجراد والحشرات الذباب والباعوض و(النمتي والقراص) وحشرات اللمبة ودي قال فيها ود شاروني

نجم النترة في شفق الحارات غزة

وين الشاف صبيب براق السحابة الرزة

قنيبة الفارس الفوق المسمى هزة

فرقها مر ودر من لساني اللذة.

العينة البرجي بعدها اسمها (الطرفة) وفي مزارعين يسموها الطرفة البكاية لانه المطر البنزل فيها غزير جدا واكتر أمطار بتصب بالنهار وتستمر لفترات أطول بنقاط صفاااار بسموها (سراية) وبكون في بوار في الزرع(عدم فلاحتها) الجو فيها مغيم بااااردالبرق فيها نادر و الرعد قليل تروي الأرض (مجيغة) ودي قال فيها شوراني

ظميانين ووابل الطرفة فينا يهطل

من الخلا كل عملنا سار متعطل

ست حد الصبا اللغناه مابنبطل

رايو معاه تشفي المنا والله تقتل.

نجي لعينة( الجبهة) جبهة الأسد العالية التي تعطيه الهيبة ودي من اعتي عين الخريف أمطارا غزيرة جدآ الجو فيها حار بالنهار وكاااتم في الليل فيها سحب متراكمة هطالة وبرق قوي ورعد شديد اغلب الأمطار فيها بالليل وعند الصباح تشرق الشمس ساطعة وسخنة (تقلي الحبة) وفيها يزيد نمو النباتات والزرع يستبشر بها المزارع ودي قال فيها الشاعر عبدالله حمد

الجبهة ام سواري سحابا بيت مالي

برقآ رف زكرتني الوضيبة مخالي

فريدة عصرها ملكة دهرنا الحالي

لونا جواهر الدر المزين وغالي.

بعدا بتجي عينة( الخيرسان)أو الخرصانة وهو نص راس الاسد البظهر عند عبوره وسط الحشياش. ودي آخر العين الكبيرة وفيها ترتوي الأرض بالمطر وتكون الموية راقدة في الأرض لونا شفاف اغلب أمطار العينة بتنزل بليل البرق متفرق من محل لمحل والرعد خفيف والندى بكون كتير لدرجة تنحني النباتات وتلامس الأرض وبنجاح عينة (الخيرسان) يكون الموسم وفير والاغضان مليانة بالبذور وفيها ود شوراني قال

برق الخيرصان ألفي سحابه يشلع

اسهر نوم عيوني ببريقو البريدي مقطع

السبب المحرك نار قلوبنا تولع

سما لحا دوف جملي المشيهو تدلع.

عينة الصرفة (صفحة الأسد البتعني ابتعاد الأسد) وبرضو اسمها سهيل الماوراها سيل و أهلنا المزارعين بسموها (مطر البخات) أمطار بتكون خفيفة ومتفرقة حظوظ وصدف وتصب في العصر احيانآ نص النهار (فقاعة شمس) لكن يخشاها من يزرع السمسم لانه في الفترة دي بكون السمسم مقطوع الأمطار (بتصوفن) جرون السمسم والهوا بيحت البزورة وبشتتا بعيد وهنا ود شوراني قال

برق الصرفة شال تحت السحاب وغتي

زكرني ابمرايتآ لي أبت تتغتي

ظبي البلجزو السعن سدرهن شتي

دكتور علتي الي غيرو

ما بتنختي.

وصلنا لآخر عينة عينة العوا (زئير الأسد) فيها يقل المطر ويسمع صوت الرعد متباعد وبعيد وتخلو السماء من السحاب الا المتفرق القليل و(السماك) بداية دخول فصل الشتاء ونهاية الخريف وفيه تتم عملية حصاد المحاصيل ويقول المزارع(ياسما امسكي ماك ويا مطر كفاك ويابحر بقفاك)

معرفة العين وتوقيتا مهم جدا للمزارعين وناس الارصاد الجوي لتحديد مواعيد الزراعة و الحصاد. دا موسم الخريف بي عيناته وخيرو بسحابه ورعده وبرقه جميل بامسياته لطيف باجواءه ملهم لكبار الشعراء زي شاعرنا الدكتور عبدالله اسماعيل قال فيه

“بريق المزنّة يا ماطر، أريتك تبقي غاشينا، وأريتك تجبر الخاطر، ترد الروح علي زولا يشيل ليلين علي باكر.

ويبقى الخريف أجمل فصول السنة.