سيكتب التاريخ… «القحاطة الشوم» دمرّوا الخرطوم!!
الظهيرة- د. أحمد منصور المحامي:
⭕ سيسجل التاريخ بالساعة واليوم بأن القحاطة الشوم دمروا الخرطوم … من منا كان يصدق بأن الخرطوم ستصير هكذا من بعد الأمن والأمان الذى كانت تعيشه ويعيشه مواطنها …
قال عز من قائل :
وإذ تأذن ربُّكم لئِن شكرتم لأزيدنكم ولئِن كفرتم إن عذابى لشديد …
وطبعاً عهد الفوضى المطلقة كان فى عهد حكم العلمانيين والملاحدة للسودان عقب ثورة الخراب والدمار.
وقد جعلت أصحاب النفوس الضعيفة والأيمان الأضعف وأصحاب الهوى والمجون أقرب للكفر منه للإيمان إنجرف كل هولاء مع تيار الانحلال القحطى وقد نسوا ذكر الله تعالى فأبعدهم الشيطان الرجيم عن الطريق القويم والصراط المستقيم وقال لهم يا بنى قحيط لا غالب لكم اليوم وبنى دعيم من خلفكم يساندونكم …
فعــاثوا فى الأرض فساداً ولم يقبلوا بأى أحدٍ أو حزب يخالـــف الرأى أن يشاركهم فى الحكم والسلطة والمشــورة …
وصنعوا دستوراً علمانياً ليطبق فى بلد مؤمن وأهله مؤمنين …
فعارض المؤمنون الصادقون إطاريهم العلماني البغيض بكل ما أوتوا من قوة …
وعندما علم أهل اليسار بأن الإطارى طار وعدوا أهل السودان بحرب الخراب والدمار …
وقامت الحرب وأكلت الأخضر واليابس ومات من مات وجرح من جرح وتشرد من تشرد ونزح من داره من نزح …
كل ما حدث لأهل السودان كان بى سبب مجموعة الحرية والتغيير …
… أخيراً …
كثير من الشباب الذين خدعوا من قبل بحرية قحط الزائفة وسلامهم الكاذب وعدالتهم العرجاء لفظوا قحط بعيدا كما يلفظ البحر الجيف.
ووضعوا أياديهم فوق أيادى إخوانهم فى الأحياء والفرقان دون النظر إلى ألوانهم السياسية ليقاتلوا جميعهم جنباً بجنب مع جيشهم العظيم دفاعاً عن عرضهم الذى هتك ومالهم الذى سلب ووطنهم الذى نهب …
غايتووووو …
الله يصبرنا على غباء بنى قحيط ديل …
قالوا شنو ؟؟؟؟
قالوا كل القوة الخرطوم جوة من أول ديسمبر وده كله عشان ثورة ديسمبر أقصد ثورة الخراب والدمار السمبرية تعيدهم تانى لكراسى الحكم وطبعا على جماجم وجثث ودماء الشباب للمرة الثالثة …
الأولى فى بداية الثورة والثانية فى إعتصام الثورة …
بى كده أثبتوا إنكم إنتهازيين وبجدارة كمان …
وكمان إنتو لسسسه فى غيكم القديم ومفتكرين الأولاد ديل ح يتغشوا ليكم تانى ذى زماااان يااا حليلكم …
طيب يا قيادة قحط ما تجربوا تجوا السودان قبل الأولاد ديل فى أول ديسمبر وانزلوا قبالهم للميدان …
ورب الكعبة كان جيتوا ح تعرفوا الطفى النور منو يا أولاد أم ذقدة …
الخرطوم بقت مقبرة لى الخشوها بالباب الورااااا …
يا أخى ديل أولاد الخرطوم الفى الدواس ما بعرفوا النوم …
وكمان عافى منكم يا ناس ولاية الخرطوم …
الما قعدتو ليكم فى خيمة لاجئين …
ولا قعدتو ليكم فى معسكر نازحين …
ولا لإغاثة المنظمات الأجنبية منتظرين …
ديل ناس الخرطوم يا نائب حاكم إقليم دارفور …
غايتووووو ..
الشبكة الأيام دى أخير منها شبكة الحواتى …
