صحيفة الظهيرة ترصد تعافي الخرطوم… َعودة النبض بوتيرة متسارعة لسوق ستة الحاج يوسف

الظهيرة – حوار أجراه: علاء الدين محمد أبكر:
في قلب سوق ستة بالحاج يوسف، وبين أصوات المطارق وروائح اللحام وصخب الباعة، التقينا بالمواطن أيمن محمد عثمان حامد، فني الإلكترونيات، صاحب الورشة المتواضعة التي أصبحت مقصداً لأهالي المنطقة، فكان هذا الحوار الصريح الذي يتحدث فيه عن بداياته، وعن معاناة الحرفيين، وعن أحلامه البسيطة.
س: في البداية.. عرفنا بنفسك؟
ج: بسم الله الرحمن الرحيم والصلاة والسلام على رسول الله أشرف خلق الله سيدنا محمد وعلى آله وصحبه وسلم. أنا أيمن محمد عثمان حامد، مواطن من مدينة الحاج يوسف، أعمل في الحاج يوسف سوق ستة، فني إلكترونيات.
س: كيف بدأت مشوارك مع مهنة الإلكترونيات؟ ولماذا اخترت هذه المهنة بالذات؟
ج: والله بديت الشغلة دي من بدري، من زمان وأنا بحب الشغل ده. كنا بناخد كورسات في التدريب المهني كوبر، واتدربنا على أيدي أساتذة كبار، وبعدها جيت عملت العملي في الحاج يوسف سوق ستة، والحمد لله ما شاء الله عندي ورشة متواضعة صغيرة وشغال فيها، عايشين منها والحمد لله رب العالمين.
س: حدثنا عن ورشتك.. ماذا تقدم للمواطنين؟
ج: الورشة صغيرة ومتواضعة لكن بتخدم ناس كتار. بنشتغل في كل الحاجات الضرورية في المنزل، يعني فني الإلكترونيات، المراوح، البوتجازات، التلفزيونات، الشاشات، كل الحاجات دي متكاملة. يعني الزول لما تتعطل ليه مروحة أو شاشة أو بوتجاز بيجيبها لينا، ونحن بنرجعها ليه شغالة زي أول وأحسن.
س: هل تعتبر مهنة الإلكترونيات مهنة سهلة؟
ج: أبداً، ما سهلة. دي مهنة دايرة صبر وتركيز ومتابعة، لأن كل يوم بتطلع أجهزة جديدة وتقنيات جديدة، ولازم الواحد يطور نفسه ويتابع، عشان يقدر يصين أي جهاز يجيه. لكن الحمد لله حب المهنة بيخلي الزول يتحمل أي تعب.
س: كيف ترى وضع الحرفيين اليوم مقارنة بالماضي؟
ج: والله نتمنى إنه الحرفيين زمان كان عندهم تنظيم وعندهم خدمات بيقدموها لنا، كان في اتحادات ونقابات بتنظم الشغل وبتدافع عن الحرفيين وبتوفر ليهم خدمات، وهسه الحاجات دي اتعدمت بقت ما في، للحرفيين ما في أي خدمات، ما في أي حاجة. بقى الحرفي شغال براه، لا في زول بيسأل عنه، ولا في زول بيقيف معاه لو مرض أو اتعطل.
س: ما هي مطالبك ومطالب الحرفيين من الدولة؟
ج: المفروض تكون في مشاريع، كان بدت في الحكومات السابقة، يعملوا للناس مشاريع ركشات، تكاتك، حاجات زي دي، تمويل من البنوك وكده، لكن هسه الحاجات دي بقت ما فيش. نحن دايرين تمويل عشان نكبر ورشنا ونشتري معدات حديثة، ودايرين مشاريع تساعد الشباب الحرفيين يبدوا حياتهم.
س: هل هناك حاجة لخطة إسكانية للحرفيين؟
ج: أيوة، ودي من أهم الحاجات. على الأقل المهندسين دول بيكونوا بادئين يا دوب، الواحد داري يكوّن نفسه، في واحدين لسه شباب، واحد داري يتزوج، المفروض تكون في خطة إسكانية، في حاجة زي دي بالنسبة للحرفيين، لأن الحرفي لو ما لقى سكن مستقر ما حيقدر يركز في شغله ولا يبني مستقبله.
س: لماذا تعتبر الحرفيين شريحة مهمة في المجتمع؟
ج: لأنهم شريحة مهمة في المجتمع، بتدعم وبتساعد المجتمع مساعدة فعالة. تخيل لو ما في فني إلكترونيات، ولا سباك، ولا كهربجي، ولا نجار، المجتمع ده حيمشي كيف؟ نحن بنقدم خدمة يومية لكل بيت، وكل أسرة محتاجة لينا، الشريحة دي شريحة مهمة، المفروض الناس تقف عندها، وتدعمها، وتوفر ليها كل الخدمات.
س: ما هي رسالتك للشباب الذين يريدون دخول مجال الحرف؟
ج: بقول ليهم الحرفة شرف، والشغل ما عيب، الزول يتعلم حرفة ويعيش منها بكرامة أحسن من إنه يقعد عاطل ويمد يده للناس. الحرفة بتصنع الرجال، وبتخلي الزول يعتمد على نفسه.
س: ما هي أمنيتك الشخصية؟
ج: والله المستعان، الواحد يتمنى زيارة بيت الله الحرام، ويؤدي مناسك الحج والعمرة، وربنا يسهل الأمور إن شاء الله. دي أمنية كل مسلم، وإن شاء الله ربنا يحققها لي ولكل الناس.
س: كلمة أخيرة؟
ج: بشكركم على الزيارة والاهتمام بالحرفيين، وبتمنى من المسؤولين إنهم يلتفتوا لينا شوية، ويدعمونا، لأننا شريحة بتخدم البلد، والسلام عليكم ورحمة الله وبركاته
جميع الحقوق محفوظة 2026@.



