عباس حديبة يكتب… الديوك

أصبحنا في الآونه الاخيره معظمنا جواهو ديك بميزات تختلف عن الآخر حسب الظروف المحيطه بك وثقافاتك..

ديك البطانه⬇️⬇️

يقال انه ذهبوا به إلى السوق وكان وقتذاك يربط على زوايا اللوري من ارجله بوضعية الرأس لي تحت والكرعين فوق… ودوه السوق وما جاب شي سألوه اها السوق كيف قال ليهم مشيت مدلدل وجيت مدلدل.. ودا بنطبق على الناس البسافروا المؤتمرات والسمنارات ويجييك ما عارفهم قالوا شنو اجييك (اباطو والزنكي)..

ديك ميمونه⬇️⬇️

ودا الشخص الذي يكلف بمهمه محدده ودائماً يشترا باختلال المواعيد ويجي بعد البقر اي بمعني الديك الذي يعوعي بعد أو قبل صلاة الصبح لاناراً تحرق ولا دخاناً يعمي.. ودا المسؤل الاشتر في التصريحات والتغريدات

ديك الجن⬇️⬇️

عندنا عادات وتقاليد ومنها عادة (الدستور) الزأر يجتمعن النساء لممارسة طقوس تصل لشرب الدم والخمره (البيره) والذبائح ولبس ملابس غريبه والسجائر وخاص بالنساء وأحيانا رجال نص كلتش كدا.. وهذا الديك يذبح عند هذه الاهازيج..

ودا النوع البكون ماش في الزفه وتجيهو طلقة طائشه..

ديك المسلميه⬇️⬇️

دا طبعاً مفرفش ومبسوط ولكن بصلتو في النار وحلتو اغسلوا فيها وشغال اغني ودا السياسي الدرويش وبثق في من حوله..

ديك اللنقاي⬇️⬇️

ديك صوتو عالي صارخ جعجاع حجمه اقل من الديك العادي لايصمد في القتال.. ودا بنلقاه في الزول المحرشاتي والذي يتزعم المشاكل واول الناس هروباً من أرض المعركه..

ديك العِده⬇️⬇️

بقى دا ديك راكب رأس بطلع في مغسلة العده (لو نهرتو بكسرها ولو خليتو بخسرها) ودائماً تجده في المؤسسات أو على مستوى العائله هذا الديك..

ودا النوع لما تتناقش معاه اقولك كدا بس يازول..

ماعندو اي دفوعات أخرى.

ديك الحِله⬇️⬇️

الحِله هنا المقصود بها القريه أو الفريق

دا ديك تجده يباري بالكوش ورث الريش ماعنده علاقات مع الدجاج وبعوعي في اي وقت.. ودا بتلقاه على كافة المستويات ينقل الاخبار وجاهز بأي معلومه لكنه غير مفيد لايغلط عليك ولا بوسخ يديك..

ديك الحَله⬇️⬇️
ودا الديك (الوديك) اي بمعني السمين دا مهمته الرمرمه ماعندو شغله همه الطقه (العليقه)..

ودا ماعندو مهمه الا يتأكل بس.. واستخدامه في دفع (الشير)

ودا الناس بيستخدموه نظام (القشره) ودائماً بكون عصاة قدله ولزوم الوجاهات وبنفع في مشاوير الخطوبه لانه عدة شغل..

ديك المكوه⬇️⬇️

ودا بقى من الجمادات نجده في مقدمة مكوة الفحم وعنده علاعل حُمر عندما تكون المكوه جديده..
ديك وجيه وقاعد قعده صاح..

وزي دا الزول الوسيم ومهندم لكن الرأس قرقوره يعني سماحة جمل الطين هو صوره بديعه وجميله لكن بس ما يتكلم..