صبري محمد علي (العيكورة) يكتب…. الخبيرة أماني الطويل وخالتي السُرّة بت عجبين

يا جماعة الخير ….!!

المصريين ديل عاوزين مِنّنا شنو بالضبط؟

(ياخي) مصدعين رُوسينّا بالخبير الإستراتيجي فلان الفلاني والعالم الجهبز مُش عارف الأستاذ الدكتور فلان بن شحّاته البلّاع

 

والصِّلع و بِدل الحرير تُكمل المشهد !

 

واحده إسمها (أماني الطويل) أي شاشة (ناطة) فيها تتحدث عن السودان وتثبط وتلمز وتغمز في قواتنا المسلحة كخبيرة في الشأن السوداني (وكده)

وأخرتها تطلع خدعة !

ياخ دي بتقول (أم دافوق) على الحدود الاثيوبية !

تخيّل يا مؤمن

جنس الضحك على الذقون ده يقولو فيهو شنو؟

 

وجنس الإستهبال المصري ده حدّو وين يا جماعة؟

و(لامتين) سيظل وطننا الحديقة و المستودع الخلفي؟

 

أليس بمثل هذه البضاعة الفاسدة التي جسّدتها الخبيرة في الشأن السوداني ! أماني الطويل

 

ياخي الخبرة دي ما فوضى ساكت ولا مساحيق و شاشات يا سودانيين أصحو يا ناس فقد إنتهى زمن إنتظار الفتوى من مشيخة الأزهر عبر (البوستة) وإنتهت مقولة وما السودان إلا للغيد والعبيد والذهب محمد علي باشا قائلها

يا جماعة الخير ….

إقرأوا التاريخ بعين فاحصة مصر الحالية ليست هي مصر الفرعونية التي يتغنوا بإهراماتها تلك أمة قد خلت من الزنوج و النوبة

يا شباب إنعتقوا من وهم المسلسلات وعلم المصريات وجغرافية نجع حمادي والمحلة الكبري و تحتمس ونفرتيتي !

فمصر شعب ونحن شعب ولم نقرأ أن النيل يدخل في تركيب علم الوراثة و الجينات !

نحن شعبين بثقافات مختلفة

 

تجاوزوا معسول الكلام يا سادتي والتصريحات السياسية المُجمّدة منذ الإستقلال الى واقع المصالح الحقيقية المتبادلة مع مصر

 

قال خبيرة قال

ياخ خالتنا السُرّ بت عجبين لو رفعت عُود الطلح ده و(شمّتو) بتوريك جايي من وين ومخزّن ليهو كم شهر ده غير الويكة و الويكاب و (خُدرة الخلا)

(خبرة زي الخبرة) كما يقول شبابنا اليومين ديل

 

تقُول ليّ أماني الطويل الخبيرة في الشأن السوداني! التي لا تعلم إن كانت أم (دافوق) بالشرق أم بالغرب؟

 

*(الوقعت في البلد دي تختاها ياخ من الجماعة ديل)*

 

أفضحوا أرزقية القنوات الله لا جاب باقيهم ياخ !

 

نستغفر الله من غضب الله

 

 

الأحد ٣٠/نوفمبر/٢٠٢٥م