صبري محمد علي( العيكورة) يكتب… إتوطا فوق جمرك
(أكعب حاجة) في الدنيا دي الزول ما يكون عارف (الضربة) جاياهو من وين !
ياخ الشئ البحصل في كردفان اليومين ديل أصلاً ما سمعوا بيهو هؤلاء الملاقيط
غايتو عمّك طبق فيهم نظريات لم يعرفها العالم من قبل
*قُول ليّ الحاصل شنو يا أستاذ؟*
(طبعن) يا إبني …..
ممكن تكون متوقع مُسيرات مثلاً بتاخد ليك (جرية)
بتتشتتو!
بتعملوا أي حاجة عشان تقللوا الخسارة مش كده يا (جنجا) ؟
ممكن تتوقع (سوخوي) لافة بتمشي تشوف ليك جُحُر تستخبى فيهو (مسلاً)
مُمّكن تسمعوا بمتحركات أرضية ماشة عليكم بتتصرفوا غايتو والزارعة الله في الحجر بتقوم
لكن كمان ……!
لمّن (عمّك) أوّل حاجة يدخل على خيار *(تحديد الكُل)*
أبوزبد (مش عارف) الدبيبات الابيض ، الخُوِّي ، أم روابة بابنوسة ، المُجلد ، أم دم حاج أحمد
و يفك ليك الشغُل ده كُلو مرة واحده
طيران
مُسيّرات
تشويش
حاجات كده ما مفهومة جات من وين
متحركات
جيش
مُشتركة
برّاؤون
العمل الخاص
بتمشئ وين يا سجم الرماد؟
تصدق يا مؤمن ده ياهو
*الكلام الحاصل الأيامات دي*
بلّ زي البل
جغم لا يستثني أحد
*شُفتا كيف*!
فهمتوا ليه يا جماعة (خالنا) ترامب إمتدح الجيش السوداني بأنه أشجع جيوش العالم وأبدى إعجابه به وقال وإنه يُقاتل من أجل الأرض بوطنية ولا يتراجع .
والفضل ما شهدت به الأعداء
ولا أجد أنسب من رائعة ود الرضى لنختم بها هذ المقال
المُدفع الرزّام
طلقاتُو من صدرك
يا جبل الضرا
المافي سيل حدرك
النار ولِّعا
وإتوطّى فوق جمرك
*والمقاس هو مقاس البرهان* ولو كان ود الرضِّي عائش لأعاد الصياغة
نصرٌ من الله وفتحٍ قريب
#جيش_واحد_شعب_واحد
السبت ١٥/نوفمبر/٢٠٢٥م
