سلوى أحمد موية تكتب… سوي الجبنة يا بنية!!

لحب القهوة وارتباطا بثقافة الشعب السوداني طقوس وعادات اجتماعية قديمة…. القهوة اوالجبنة البتعدل المزاج وبتوزن الكييف بجلساتا وطقوسا الموروثة من زمن الجدود والحبوبات في جلسات السمر ولمات الاهل والاصحاب لكن مع مرور الزمن بدت تآخد طابع تاني واضافات مختلفة وهي جزو من الثقافة السودانية .

القهوة معروفة عند السودانيين من زمان لكن ماكانت مشهورة وكانت على نطاق ضيق بشربوها كبار السن وهس أصبحت منافس قوي للشاي يشربا الشباب والمراهقين وحتى الأطفال في بعض المناطق ومن انواع القهوة العربية/ اللاتينية/ ماكياتو/ قهوة موكاتشينو/ القهوة الحبشية/ قهوة إسبريسو/ قهوة بلاد الشام /القهوة الإيطالية/ والجبنة السودانية .

البن نوع من النباتات الفيها مادة الكافيين المنبه المنشط بتختلف الجبنة حسب القهوة في البن المحمص والبن البني والبن الأسود وكل واحد ليه رواده البحبوه وبتكيفوا بيه. الناس البتكييف عندهم مابتم الكيف الا يشموا القلوة ( ريحة البن وهو في النار) والجبنة مشروب اساسي في شرق السودان عند قبايل البيجا وبتم عمل القهوة بعد نضافة البن وقليو في القلاي بوضعه على الجمر حتى يصبح لون البن بني أو اسود ويدق في

الفندق بالمندق ب(التنتنة) مع صوت ضرب الفناجيل واغنيات الجبنة التراثية(الجبنة تنتنة من بكري لي انة قوم يا الرايق تعال هنا) الموية في الشرقرق او التنكة او الغلاية تترفع على جمر النار بعد ما تكتح فيها الجنزبيل

وكم هبهانة معاهن قرنفل اوقرفة واي زول حسب البهار البكيفو في ناس بطعموها في نارا وفي ناس بطعموا في الفناجيل وفي ناس وبشربوها سادة يعني مرة بدون سكر وفي البشربا على الريح يعني خفيفة وناس الكيف وبشربوها تقيلة ومظبوطة ومن مكونات الجبنة السودانية الكانون/ القلاي /الفندك والمدق/ الشرقرق/

الصينية والفناجيل /والجبنة/ والوقاية دي معمولة بحب من الحرير الاحمراو القماش الملون والسكسك في شكل دايرة مقعد الجبنة /والليفة من لحاء شجر النخيل والدوم بتتخت في الجبنة لتصفية البن الخشن/

بالإضافة للبنابر او العناقريب (قعدة الجبنة). من انواع الجبنات في الجبنة الفخارية في جبال النوبة وفي صندوق الجبنة في الشرق وفي البتكييف الكباية. ومن فوائد القهوة منشط حيوي بتعدل المزاج ويزيل

الاضطرابات وكمان بتخفف الارق والتوتر وبتتقص الوزن. اول القهوة اسمه (البكري) والكييف بشرب منه فنجالين.

ويزيدوالشرقرق موية يرفعوه على النار دا اسمي( التني) بكسر التاء وبعدو (التلتاوي)اب عجاجا لاوي والأخير اسمو( البركة) وعند البجا اسمو(الخدر).

في شرق السودان عندالبيجة وهو الموطن الأصلي والعشق الأول للقهوة جبنة الصباح ليها معتقد روحاني انها بتسهل الطريق وبتجلب الرزق القهوة حاضرة في الشعر منهم من قال

عليك بشرب البن في كل ساعة*ففي شربه ياصاح خمس فوائد
نشاط وإهباط واذهاب بلغم*ونور لأبصار وعون لعابد

في اغنيات الشرق باللهجة المحلية واللغة العربية من أشهرها (فنجال جبنة بي شمال يسوا الدنيا بي حالو) للمغني آدم شاش وغنتها فرقة عقد الجلاد وغنى لهل مصطفى سيد أحمد (قهوة منك قهوة يسحر فيها بنك ينصهر فيها الدوا) وهنالك من غني (جابتني ريحة قلوتك اه من قهوتك) (الجو دا جو الهوا جو جبنة نشربا سوا جو جبنة ريحتا عشق والبن بالحب استوا)

للقهوة دور كبير ومكانة اجتماعية خاصة في دعم لغة الحوار واكتساب المهارات والتواصل الاجتماعي بين الأسر والتآخي بين الأهل والأصدقاء وهي رمز للكرم والشهامة.