(خمة نفس) عبدالوهاب السنجك يكتب : د. أمجد فريد… من طرف لطرف آخر ماذا هنالك؟!!

د. أمجد فريد يتاوق من على الشباك.. يعاين عايز يعرف الموية حتصب وين..

… والجماعة شافوهو من بعيد.. قالوا ليهو تعال هنا ما في داع للمتاوقة خليك قريب ما تبتعد..

.. وانا قلت حاجة ياجماعة!!..بس قلت هي حالة حرب سيئة بين طرفين سيئين.. ويجب الضغط على الطرفين لإيقاف إطلاق النار والفصل بين القوتين وعدم الانحياز لأي طرف..

.. كلامك هنا سمح عدييل يادكتور أمجد.. اها قول لينا متاوقتك كانت كيف بس!!

.. طبعا انا قدر ما عاينت ما شايف حاجة وفترت من المتاوقة دي قلت احسن اميل لأحد الطرفين السيئين.. يعني كدا “من طرف لطرف آخر واشوف ماذا هنالك”

.. واسع رايك شنو!!

… ما خلاص الحكاية بقت واضحة زي عين الشمس.. وانا راضي بي كلامكم..يعني طرف واحد سيئ بس.

… طبعا من اليوم انت مستشار للشؤون السياسية والعلاقات الخارجية… حا تعمل شنو ياسيادة المستشار!!

… مش عارف والله.. الملفات كثيرة.. حرب سيئة.. صمود.. قحت.. جنجويد.. حرب في الأوسط.. إيران أمريكا.. إثيوبيا مدورة.. وعيييك ياجماعة.. خلوني ابرد شوية..

… لمتين يعني!! بس ما تقول زي الجماعة ديلك، عايز مكتب واثاث جديد وعربيتين ومرتب بالدولار وتعيينات من الأسرة والأصدقاء والجيران وأولاد الحلة كمان.. لانو الميديا شغالة فينا “قرف” خليك رايق لمن نشوف الباقي علينا شنو!!

… ممكن اشوف ليكم جماعة صمود وتأسيس و.. و.. اقعد معاهم.. كمان!!

… يازول روق المنقة!!

.. طيب اعمل شنو!!!

… اعمل نايم!!

.. خلينا اول حاجة نكلم الناس ونقول ليهم كلام زي “فرشة تمهيدية” عنك. عشان يسكتوااا من رب.. رب دي.. الميديا مسخنة.. تصرخ أمجد.. أمجد.

… أمجد فريد الطيب طبيب وسياسي من الشخصيات المدنية البارزة في السودان شارك في إسقاط نظام حكومة الإنقاذ وعمل مساعدا لكبير موظفي مكتب عبدالله حمدوك (2019) (2021) م.

كما عمل مستشار سياسي لبعثة الأمم المتحدة عام (2021)م، فهو يدعو إلى حل سلمي ينهي الوجود المؤسسي لقوات الدعم السريع المتمردة، ويطالب بإصلاحات هيكلية في المؤسسة العسكرية مع حماية المدنيين وهو من الذين ينتقدون التدخلات الخارجية في السودان خاصة دعم دولة دالإمارات للدعم السريع المتمرد.

.. فقد جاء تعيين د. أمجد في وقت يشهد في السودان تحديات سياسية واجتماعية وأمنية كبيرة..

… فهل سيظل المستشار (يتاوق) من على الشباك…أم أنه سوف يتحرك بكل حرية بالتنسيق مع وزارة الخارجية السودانية.. التي تحتاج لتدوير العجلة من دون توقف..

..نشوف.. بس ما يخم نفسنا زي ناس.. فلان.. وفلانة. كفاية علينا.. لقد” هرمنا”

(خمة نفس)

فريق الهلال السوداني يخسر ويخرج من بطولة كأس افريقيا ممثلا للسودان…المريخاب آخر شماتة.. ما هكذا يادكتور مزمل أبوالقاسم واخرين.. من الأجدر نشجعه.. ونقف بجانبه لا نشمت عليه… الهلال لعب بأسم الوطن.. والوطن للجميع فهو السودان العظيم.