(خمة نفس) عبدالوهاب السنجك يكتب : حاج سيداحمد كان ياهو الحال الكاكي جاييكم عديييل

.. ما خلاص بلاش دسديس واحسن الحاجة تكون فوق مطروحة طرح نلقى الجماعة عملو ليها توم شمار انتوا عايزين تودي البلد على وين بس..

@ مالك ياحاج سيدأحمد فاير فينا اليوم من الصبااااح

 

# ياحاج حمد انت ما شايف الضالع اليمين ديل.

 

@ اها في شنو كمان قول لينا يا ابو السياسة والأخبار.

 

# اقول ليك انت مكتب د كامل ما فيهو وجيع كل مرة طالعين لينا بكلام وبعد شوية نفى اسع دا وقت الناس تسمع بانو د. ليمياء خلاص سايبة البلد اقصد الوزارة وقبلها قالوا الفريق كباشي كمان طالع من مركز القيادة ونازل معاش..

 

@ ياحاج سيدأحمد انت كان باريت الدجاج بوديك الكوشة عديييل وكما كان تابعت الكلام البتكتب حا تلقط الورق من الشارع..

 

@ اهااا كدي عدل لينا راسنا دا فهمنا يا ابوالعريف

 

# حا افهمك تب بس قول لي فردتك حاجة نفيسة سوى لينا قهوة مظبوطة بالجنزبيل عشان انت تفهم بس.

 

# حاضر ياولد.. قول لي حبوبتك عملي لينا قهوة عشان نفهم من سيادتوا المحلل الاستراتيجي دااا

 

@ ياخوي خت بطيخ صيفي في بطنك مافي كلام بالشكل دا مافي تغيير من الأصل د. ليمياء زولة مجلس الوزراء قاعدة في محلها وكمان الفريق كباشي ما ممكن يمشي ولا بتزحزح من محلوا… وعلى بالطلاق لو مشى نقول خلاص انبشقت. دي اشاعات سااااكت بس عايزين ليهم طريقة يرجعوا لكن مافي ليهم تاني يشموها قدحة.

 

# غايتوا انا بقول لو مكتب بروف كامل بالصورة دي العساكر بنطو فيها تاني، ونقول عندهم حق والف حق لانهم قالوا لينا هاكم امسكوا البلد خلونا نحن نكاتل الجنجويد ديل ونقطع اصلهم محل ما بان، واسع دااا حكومتنا المدنية دي تميل شمال ومرة يمين ما عارفة تسوي شنو..

 

# ياحاج سيداحمد ماتصبرو شوية طوالي عايزين تغيروا الجلابية وتلبسوا الكاكي.. ة

 

@ غايتوا الجيش ماشي حسب الخطة الاستراتيجية اليوم في كردفان بكرة في دارفور والجبال لمن يكمل المتمردين ديل ويلقاكم في حالكم داا بنط فيها وتبقى كاكي أخضر وتأني ما عندكم كلام واحسن حكومة الأمل دي تضبط الإيقاع كويس لو جابت نقرة مخالفة حرم تلقوا الجيش الما هين نط فيها تاني اصلا هو ما فاضي للبكورك في الداخل والخارج.

 

# يعني بي كلامك دا حكم عسكري.. َ

 

@ ايوااا لو بالحالة دي حكم عسكري وانا متأكد الشعب حا يفضو للحكم، وداا الحايحصل وشايفو قدام عيوني كمان..

 

# احسن اشرب القهوة واتخارج قبل ما تجيب لينا ضغط وسكري ما اصلك انت ما بتقول خير ولا عندك خبر سمح وزين.

 

@ كب الجنبة ساااااكت التقول جايب بنها ولا سكرااا.. ما انت اصلك ما بتفهم.. اشرب وقوم على شغلتك..

 

# خليتك بعافية ياحاج سيداحمد والله يكضب الشينة ويدمر الناس البنشروا الإشاعات دي.. مع السلاااامة.

………….

(خمة نفس)

ولاية الخرطوم أصدرت قرارا لكل المواطنين بحمل الأوراق الثبوتية،

طيب نحنا وين من دااا ياااا ولاية الجزيرة.. يجب مرادفة الإعلان مع الخرطوم ونزيد عليهو شوية وذلك بالغرامة في حالة عدم ابراز هوية إثبات الشخصية.. لانو الشفناهو ايام التمرد السوداء ما عايزنوا يتكرر تاني خالص…ونطالب بشدة والي الجزيرة بإصدار قرار بذلك..