(خمة نفس) عبدالوهاب السنجك يكتب : حاج أحمد نحن الدولة الثانية في العالم من حيث الحمير

.. لم يكن حاج سيداحمد يعلم أن السودان هو الدوله الثانية في العالم بعد دولة إثيوبيا من حيث تربية الحمير، فكان دائما في حالة من الهياج والصراخ مع الدحيش ولد “الحمار” غير أن حاج احمد” ابوالعريف” عرف كيف يقدم له النصيحة والمعرفة أن الحمير ثروة اقتصادية لايمكن ان التفريط فيها ويجب الاستفادة منها اقتصاديا.

@ ليقول حاج سيداحمد وهو يتكئ على وسادته،، كيفن يعني أنو الحمير ديل ثروة اقتصادية ياحاج حمد كل يوم جايب لينا موضوع جديد، كدي اقعد لي في الواطة دي وقول لينا كلامك دااا عدييل ما اصلك زول محن.

#.. حاضر ياحاج سيداحمد اصلو انت عارف الحمار عندنا بنشغلوا شنو.. في السفر الكارو وقلايب الرملة من البحر ماهو صبور وبال طويل، والزول لمن يقولوا ليهو انت حمار ما نبذوهو، لكن عندنا في السودان نبذوهو ومسحو بيهو الواطة كمان والحمار عندنا شايل الشيلة في كل الزمن لكن نحنا ما مهتمين بيهو.

@..خلينا من الفلفسة بتاعتك دي شوف يا ابو العريف ورينا حماري دا بيجيب كم دولار، وبسعر اليوم كمان.

#.. طيب اقوليك ياحاج سيداحمد حمارك دااا من الاخر بيجيب كم واحسن اوريك اول حاجة أسعار الحمير في العالم كمان.. َوهاك دي ياحاج، الصين بستورد الحمير من أفريقيا، سعر الحمار يختلف من دولة لدولة حسب الطلب والجودة، وجلد الحمار في الصين ياحاج يصل سعره إلى( 1000) دولار أمريكي، لانو بطلع منو دواء تقليدي يقولوا ليهو “إيجياو”. وفي أفريقيا سعر الحمار بين( 120-145) دولار أمريكي، والحمار المصري (3000) جنيه مصري هو معروف الأفضل على مستوى العالم.

@ حاج سيداحمد وتأني البلاد القاعدة تشتري الحمير ياتو بلد

# طبعا الصين وهي مستوردة لجلود الحمير،وهي عشان تطلع منَو الدواء للعلاج
ودا ياحاج سيداحمد دواء تقليدي صيني من جلد الحمار، و من الأدوية المرموقة والمعروفة في الطب الصيني التقليدي “البلدي” يعالج و يقوي النقص في الدم ويحسين الصحة كمان ويوقف النزيف والجفاف والكحة.

@ حاج سيداحمد بعد عدل من جلسته،، وجلد حميرنا ديل كيف ياحاج حمد..

# جلود حميرنا من أفضل أنواع الجلود، في العالم لكن نحنا ما شايفين العالم عايز شنو ، وكمان لبن الحماره (حليب الحمير) له فوائد طبية علاجية ، وليهو في الصناعة الدوائية مكانة، لانو مليان بروتينات وفيتامينات ومعادن مثل الكالسيوم والفوسفور.
ويعالج النزلات البرد والإنفلونزا والجروح كمان.

@ ياحاج حمد بقيت دكتور بيطري عدييل وخبير اقتصادي كمان، اسع يعني كداا بكون عندنا ثروة كبيرة في السودان من قبل الحمير.

# حاج حمد.. عندنا ياحاج “والله يكرم السامعين” (7.5) مليون رأس تقريبا. ممكن نستفيد منها اقتصاديا للتصدير لكن لازم تكون مطبوحة لحم وجلد عشان الجماعة مايربوها هناك وانت عارف الصينيين شديدين في الحاجات ممكن يطلعوا ليك من الحمار حمارين وزيادة دحيش كمان وبعد داك يقولوا لينا شكرا اكتفينا من الحمير.

@ حاج سيداحمد.. كلامك سمح يا ابو العريف لكن نحنا نعمل شنو!!

# نعمل اي حاجة تنفع اقتصادنا ياحاج سيداحمد، اول حاجة نحافظ على جودة الحمير، ووزارة الثروة الحيوانية والسمكية تخت الموضوع من ضمن الخطط الاستراتيجية الاقتصادية لزيادة أعداد الحمير في السودان، بإقامة مزارع وحظائر بيطرية كبيرة ومسالخ للصادر، وفتح أبواب الاستثمار في الموضوع داا، وفق شروط صحية واضحة، لأنو دااا مهم جدا.. بس ما نقوم نصدر الحمير ماشة على كرعينا..وبعدين نسمع كلااام تاني. ويكونك أبزيد لا غزا ولا شاف الغزوا..يعني اديناهم ببلاش.. وخلاص نربع يدينا ونقعد نفرج..
وكلامي داا الناس ممكن يكون شايفنوا كلام هبوب لكن دا ياهو الكلام الصاح لازمك ندخل العالم وحميرنا في يدنا مافيش تفريط حوالموضوع رايكم فيهو شنو ياحاج سيداحمد.

@ كلامك صاح ياحاج حمد وحميرنا ثروة اقتصادية لن نتركها تضيع ابدا.. عاشت الحمير لتكون ثروة اقتصادية للوطن.. عاشت الحمير.. عاشت الحمير.

(خمة نفس)
عندما ينزلق القلم عمدا وقصدا لأجل الكسب الابتزازي الملون تارة ابيض ومرة احمر ثم اسود، من دون دراية ومعرفة ببواطن الأمور وما تم وكيف تم ذلك العمل، وما سيتم مستقبلا، ينكسر القلم في وقته مطأطأ رأسه خجولا متاوريا من خلف ستار ممزق بعدما عرف الحقيقة.. فلكم في ذلك درسا لوكنتم لا تعلمون.

(خمة نفس)
شعب واحد… جيش واحد.. ” ما ينوموا”