(خمة نفس) عبدالوهاب السنجك يكتب : انت ما مجبور علينا ونحن ما مجبورين عليك.
حاج سيداحمد رجل مواقف وزول نصيحة ما بعرف يلف ولا يدور.. لو زعل منك يرميها ليك طاااخ.. وفي لسانو دائما “ياخي انت ما مجبور علينا ونحنا ما مجبورين عليك امشي شوف الشغلة البي تنفع معاك”
المرة ختاها عدييل لي وزير الثروة الحيوانية والسمكية عشان قال عايز وظيفة إضافية تساعدوا في مصاريف البيت لانو مرتب الحكومة ما بكفيهو… كلام عجيب والله…مش عجيب وبس كمان مثير ولأول مرة يحصل.
ايها الوزير والله لو شفت ولاة الولايات والوزراء بحاورا مخصصات التسير الشهرية كيف تقول داا حاوي ما بقدر عليها…
طيب نقوليك من الاخر كداا.. دا وطن اسموا السودان كان ما عارف اعرف.. وأهلوا عايشين على بصلة وموية والحمد لله.. كان ما قادر على المهمة دي عشان الوطن نقول ليك حواء والدة زيك في ملايين من الخبراء والعلماء المتعلمين الما بفكروا في القروش.
قاعدين شغالين مستورين.
ياخيبتي عليك.. ياحسرتي عليك.. وعلى الوطن الرماك علينا.
.. عايز وظيفة إضافية كما تحدد الدول العايز تشتغل فيها عديييل كدااا…والله كان احسن ليك لو بعت موية في السوق ولا اشتغلت درداقة، نقول والله ياسلاااام وزير شغال بي ضراعوااا في سوق الله أكبر بعد الدوام،
ياخي مش احسن كان تقدم استقالتك بدل السويتوااا داا.. وبعداك تطلب الوظيفة لكن عايز تركب سرجين “ركيب سرجين وقيع”
قال عايز وظيفة إضافية….عشان المرتب ما بكفي المصاريف…
والله ياحكومة الأمل عملتوها في الزول داا.. جيتوهو فزعة بقى ليكم وجعة.. احسن تقول ليهو شكرااا جزيلا كفيت ووفيت.
ما قلنا ليكم ما تعينوا زول من برااا البلد (مغترب أو حامل جنسية) وزير ولا خفير عشان ما يوجع قلبنا.. ويعمل ضفط وسكري..
اها جاتكم عدييل بالباب الامامي امسكواا الخشب بس،
وانا بقول ليكم بصراحة احسن الزول دااا يمشي لانو ما يفيد البلد في حاجة قلبوا ما على الوطن قلبوا على القروش، وحا يخم نفسنا معاهو كمان وما يفيدنا في حاجة والله.
.. لو ما عارف حقوا يعرف في وزراء اتبرعوا مرتباتهم وقالوا عايزين نشتغل مجاني كداا.. وفي الما عندوا حق مصاريف اليوم..
(شكرا وزير الثقافة والإعلام أ. الأعيسر …شكرا والي ولاية الجزيرة ووزراء حكومتة).. نحن عارفين انتوا كيفن مدورين الولاية بطريقة “الحاوي”
(خمة نفس)
شعب واحد، جيش واحد.. ماينومواا
