عبدالله حسن محمد سعيد يكتب…. بالأمل والفرح…. راجعين ودمدني!!
ياخ كفايه تعال نرجع للديار نبني ونعمر ۔۔نعيد الفات ونجدد نمسح الاحزان ۔۔
نراجع الكان ونعيش اخوان بدون احقاد ۔۔ بلد يسعنا جميع كل السحنات هوية سودانية نزرع خير لكل الناس بدون وسواس ۔۔ صادقين احساس ۔۔تعال ياخ بدون تعطيل لبعضنا نشيل ونعدل الميل ۔۔۔
تعال نتلم في الساحات نعيد اللمه في الميدان ۔۔ في العصرية والكورة والقينان ۔۔ حليل ايام الزول يود سابع جار ۔۔ وصينية الفطور والغدا للضيفان في الصالون ۔۔ وحليل مشاوير الحبايب والصحاب ۔۔ وجبنة العصرية وونسة ناسا في البيت كتار متسامحين ومبسوطين ومتحابين۔۔ حليل اللمة في الحله والاعراس وطهور العيال ۔۔
حليل الحبوبة تحكي في الزمن الجميل وكت اللعب والهظار ۔۔ وشليل الراح واكلو الدودو وليل الغناء ورقيص العروس ودلوكة ناس فلان ورقيص رقبه وعرضة صقريه وناس كتار ۔۔
والغزل العفيف واللبس النضيف والترحاب بكل ضيف ۔۔۔حليل الناس في البوادي والفرقان والمدن الغناها يطرب المهموم والفرحان ويرقص الصاحي والسكران ۔۔
۔حليل ايامنا في الدكان كان عندك تشيل وكان ماعدك دفتر الجرورة ملان ما تشيل هم يمين ايدينا معاك ۔۔ والقيلولة والونسه الدقاق ۔۔ حليل ناس الشارع وزوار المكان ۔۔
جبين مطروح وعطر يفوح وحديثا زين ما فيه جروح ۔۔ حليل بنات الحي مرحب حباب مي وسعاد ونهله ورباب ۔۔ اخوان واخوات والكل ودود يلقاك بالترحاب ۔۔ وناس البيت كبار وصغار ۔۔ والكل ينادي حبابك حباب الضيف حرم تدخل علي الصالون وابريق وصحن غسيل ۔۔
ونحاسا يوج مختوت ليوم الكريهة اتنادوا للفزع والدواس المر ۔۔۔ مركون ماليه التراب وسكنت فيه البراغيث والجعارين الكتار ۔۔ ما الزمن داير القرنوف والدوشكة وبرميل البارود ۔۔ بس يمين ماننسا تاريخه ونضال ناسو في ابحراز ودا الكواهلة وعركيين ودار جعل اولاد جابر الزينين ۔۔
حليل مجانين المداين الكتار ومساخ داك يكورك وداك يغني وداك قاعد تحت الشدر والنيم وداك يحن وصوتو يئن ۔۔ وداك يديه لقمة عيش ودا يديه كم قرش وهو ينكرش وقاعد في برش ۔۔
حليلهم مع الماره يطقع في الحجار مع موهوم ومو مهموم ۔۔۔ حليل شوارع المدينة وصخب الباعة ومطاردة البلدية ونقاش قهوة ادروب وشارع النيل ۔۔ والجلسه في النجيلة ولمة الاخوان في المساطب والكل طربان ۔۔
حليل بحر حنتوب وناس حنتوب وناس جناين حنتوب والعلم في حنتوب ونغنيها مع الكاشف حنتوب الجميله ويا حليله ۔۔۔حليل جزيرة الفيل والدرجة والابحاث وحليل ناس الهوارة والمدنيين وقبة مدني السني وودكنان وحليل ابشبكة وودشاطوط وكل القباب والنوبة والعصري وانشاد الصوفية في بانت وليلي المولد وباردبس وحليل ناس جبرونا وسنكات الناس الحنان والعلم في المدارس والمعاهد والجامعات وصف الرغيف والدي وخليفة وفول ابوظريفة وقهوة الزيبق والهلاهوب والخواجه الكان معانا زمان وود رمضان ولمة الحفلات والغزل العفيف وغنانا والطمبور ۔۔ وبركات وشندي فوق وريحة الكليت والشاف ۔۔
اولاد جابر وناس نصرة بت عدلان ومرنجان سودان دردق وعووضة كمان ذكري حبيبة وسعدا كان حليل الفات خلا الديار يازول بكره يرجع مع القماري ونسجع مع وداللمين والكاشف وودالبخيت ۔۔
كفر وابداع الاهلي وجزيرة الفيل والاتحاد للفن والكفر دليل ۔۔ يازول كل البلد والشوق شروق وغروب وشمال وجنوب حليله مدني ام الجزيرة وصدرها الحنين ۔۔ وقوة ما بتلين ۔۔ صناديد الرجال ناس ابزيد وابوعاقلة وعبدالله موس وشقدي والشافعي شمس الدين ۔۔ ناس الحلقة ومديح الحبيب والسبحة واللالوب ۔۔ ناسا زادهم مرغوب ۔۔ وشخصهم مهيوب ۔ خاتين اللوم والعيوب ۔۔
وحليل بركات ومحالجها وبلق قطنها وعافية بدنها وخيرها واملها ۔۔ حليل الجزيرة وجمال مدنها غناها جميل وخيرها متدفق عديل ما فيهو الا ما يطيب النفوس وصادقين نوايا ظاهرين هدايا جميلي السجايا كريمين ومتسامحين وسمحين ۔۔ كلهم خير للبلد فاتحين التكايا للماشين والغاشيين وما بسوا الشين يمين طيبين ۔۔ الكرم وجمال الناس وطيبة الناس وحلم الناس ۔
الجزيرة اساس لكل الناس ۔۔ ودا عنوانا ذراع ممدود بالترحاب وابتسم انت هنا وانت كدا ونحن يمين كلنا سوا نعيد السيرة زي اول احسن ۔۔ نبني البلد تاني دون احقاد وبالترحاب نقول اهلا خلاص فهمنا العبة انتهت وما زول بفرقنا۔
يا خ راجعين ياخ راجعين ۔۔ بالامل راجعين بالفرح راجعين ۔۔ بنات وبنين رجال وحريم صغار وكهول ايدينا للبلد نبني يا ولد ۔۔۔ يمين جايين وما غيرتنا ظروف ولا بدلتنا محنه ۔۔يمين راجعين يسبقنا الشوق قبل العينين ۔۔ متشمرين سوعد تبني تعيد الكان قبله زمان احسن مما كان ۔۔
شعارنا نحن وطن يسع جميع ۔۔۔