عباس حديبة يكتب…. الحرابة ليست بندقية فحسب

▪️عاوزين نتحدث عن امكانية مكافحة نواقل الامراض من الحشرات.. و طرق محاربتها..

اولاً بعوضة الزاعجة المصرية دي اصلاً كانت موجودة من زمن ومعاها اخريات هي اسمها الايديز والاخريات الانوفليس، والكيولكس.

وهن قبائل وعوائل واسر يعني يفوقن ال 350 الف نوع ولديهن مسمياتهن عند علماء الحشرات الطبية.
اخطرهن نوع الانوفليس والانثي تحديداً والذكر بتاع البعوض لا يلدغ (قحاطي ساي) بل يعيش علي رحيق الازهار والمياه ولا يعض لان الملامس الفكية عنده اطول من الابرة لذلك بعيقن عملية وصول المناشير والسكاكين والماص.

نحن نختصر لان الكلام كتير..

الزاعجة المصرية دي ما جديدة علينا لكن الجديد هو الفيروس الذي تنقلة الزاعجة،،
وهي كمان بتنقل مرض الحمي الصفراء
طيب!! نحن امام تحدٍ كبير لمحاربة هذه البعوضة ويجب ان لا نستهين بها لان الله سبحانه وتعالى ضرب بها مثلاً يبقي لابد ان نتدبر..
طيب كيف؟

البعوضة دي بتضع بيضها في شكل مجموعة في المياه الراكدة والبرك والمستنقعات والمكيفات وعلب المعلبات والاخطر لساتك العربات..

عشان نحن نبقي قدر التحدي يجب عمل تجفيف للمستنقعات الصغيره بطريقة المكافحة الهندسية. تصريف وتفريق وتشتيت المياه..
كدا بكون نحن قللنا فرص تكاثرها وحاصرناها كحصار الجيش للدعامه..
طيب اها يا ابو العريف بالنسبة للمجاري الكبيرة ح تجففها كيف؟

المجاري الكبيرة دي علاجها كالاتي :-

برش البرك الكبيرة بزيوت الراجع بتاعت غيار زيوت الماكينات عشان بمجرد الشمس ما تسخن بتفسد لي البيض ببقي بيض بالطوة وثانياً البيض الفاقس بكون طور مائي يرقة وشرنقة وطبعاً هي في مثل هذه الظروف عندها بوغ او بوصة بتكون عائمة ومطلعاها عشان تتنفس.. و بزيت الراجع بكون قفلت عليها الاكسجين وبتموت بسرعة ..

اها وتاني؟
نقلل من غزوها لينا بعمل التغطية الجيدة بأكمام طويلة والرش بالمبيدات الآمنة والمسوح بالزيوت العطرية الطاردة للبعوض.

في انواع زيوت مثل كريم اللافندا، والقرنفل بالزيت والليمون بالقرنفل دي طبعاً الحاجات اللي ما بتحبذا البعوضه.

وطبعاً هي بتجذبها ريحة العرق بتشمو من بعيد خالص.

وهي مخلوق غريب جداً عندو رادارات عجيبة يا اخي دي عندها ، مئة عين،، وثلاثة قلوب وستة مشارط في الماص بتاعها وسبعة واربعون سن وستة اجنحة وجهاز حراري ومعمل لتحليل الدم وكمان عندها بنج عشان تأخد راحتها في عملية مص الدم تخدر وتمص وتطير حتي الزول يشعر باللسعة..

وبعد دا كمان عندها محلول اشبة بالصوديوم ستريت او السكويسترم دا بعرفوه الفحيصين دا بمنع الدم ما يتجلط في الاسطوانة حقتها عشان مايمنعها من تناول وجبات اخري شويطينة خلاث،،

عندها رادارات بتعرفك قاعد وين وبالجاذبية بتاعت الرادار بتصلك..

نحن لازم نكثف جهودنا واي زول يعمل الواجب يعني لو حركت الموية بس من مكانها بتفرتق البيض لان البيض بفقس في شكل مجموعات بدرجة حرارة متصلة مع بعض يعني زي الدائرة بتاعت الراديو،
لو صبيت حبة زيت بسيطة ممكن تعمل ليك عشرة متر مربع تغطية لو ملاحظين نقطة زيت صغيرة بتغطي مساحة اكبر في الموية..

الدخاخيين مهمة لو ما في زول متحسس بالربو الشعبي او الجيوب الانفية..

اشتري ٣ لافيندا ومعاهن فازلين واخلطهم العبوة بتعمل معك ١٥ يوم،،

نحن لو اعتمدنا علي المكافحة بنشرط فواتير كتيرة،
فاتورة التعب النفسي
فاتورة الاعياء
فاتورة العربة للدكتور
فاتورة مقابلة الطبيب
فاتورة الفحص
فاتورة الدواء
فاتورة المرافق
فاتورة كفارة كفارة
والسؤال من اكل شنو وشرب شنو

دي حرب لا تقل عن حربنا الدائرة اي زول اكرب قاشو ويقوم علي حفروا يردمها..

والسلام علي من اتبع الهدى

✒️ عباس حديبة