صبري محمد علي العيكورة يكتب… بين القصرين (شُغُل مُختلف)

لا أُنكر و منذ البارحة وقلمي يُكابد (نوم الديك في الحبل)

القصر وسط الخرطوم
شُغُل مُختلِف

نجضت؟
لا أصبرو شوية
نكتب يا ولدنا
لا يا خال أصبر شوية

يا جماعة إنتو ما جوة القصر ونحن شايفنكم الباقي شنو؟

قال ليك أصبر يا أستاذ أصبر
يا جماعة
يا شبابنا
إنتو مااا كمّلتُو المرتزقة وليدات الناس ديل كُلّو كُلّو تاني في شنو؟

قال ليك أصبر يا خال
خلينا (النميّز) الشُغُل
سمح صبرنا
ساعتين تلاته يا سعادتو
الواطة صبحت !
قال ليك …..
أصبر شغالين نظافة و تمشيط
تمشطوا شنو يا ولدي
وإنتو خليتو فيهم حاجة يمشطوها يا إبني
قال ليك
معاهم لغاية آخر لستك مدور

يا ولد …..
إنتو قلبكم ده ما فيهو رحمة
قال ليك
الرحمة !
الرحمة
طلّقناها من أول يوم في الحرب

وقال ليك كمان مُتحرك المناقل الغربي (قفلها طرشا) في قرية حبيبة جنوب الخرطوم

طيب والمخارجة كيفن؟
قال ليك …
والله يدبروا راسهم

يعني الخرطوم قفلت !
قال ليك يا خال وبالطبلة والمُفتاح
فأر فأر ما يطلع منها حي

أقسم بالله ما عرفتا زاتو أغني شنو
دخلوها وصقيرا حام
واللّا ….
سيل الوادي المنحدر
واللّا شنو
غايتو آخر حاجة (لقيت روحي)
بغني في …..
الوليد الضيف غرقتنو كيف
جيبن لي هِدومو الراقده تحت القيف
ياخي ده
شغل مُختلف
وفهم مختلف
و رجالة وشجاعة مختلفة
و أول من سيسجل هذه البطولات لتدرس عالمياً ضمن العلوم العسكرية هي الدول العظمى المتربصه وأذنابها وتحت جملة واحدة
*السودان هزم العالم*
*البرهان هزم العالم*
وسيكتب التاريخ أن (الجنرال) البرهان إبن إمرأة من السودان كانت تأكل القديد قد هزم جيوش العالم مجتمعة

ياخي ده شئ يفوق الخيال والتصور
ياخي (إبرة) شنو و (زرقينة) شنو !
(عليّا النعمة)
ده درس سوداني لن ينساه عساكر العالم قد أفشل كل النظريات العسكرية وتكتيكات حرب المُدُن
قال إبرة قال
دي ما إبرة دي (مايكرو إبرة)

*تعرف يا (عب باسط)*
أنا لو كنت من قادة القحاطة (لا سمح الله) كنت طوالي سأنتهزها فرصة وأعلن عن موت حميدتي داخل القصر
وأعمل منها بطوله وأقول
والله إنو الخال كان يقود المعركة بنفسه وفعل (كيت كيت كيت) وإتلحس
وكلام من هذا الذي منو

وأخلص من جنازة البحر دي ياخ !

الله أكبر ولا نامت أعين الجبناء

أمسية الخميس
٢٠/مارس/٢٠٢٥م