سلوى احمد موية تكتب….ماتحكيه الأغنيات

الأغنية السودانية لو مسكناها من أغنية الحقيبة زمن وكرومة وسرور وزنقار مليانة شجن مليانة تطريب رغم انو معظم الشعراء الزمان ما قروا مدارس الا القليل منهم أغلبم كان اهلم بدخلوهم الخلاوى عشان يحفظه القرآن وعلومه.

لكن الزول السوداني بطبعه انسان مبدع وخلاق ذكي وسريع البديهة وخياله واااااسع . والشاعر سيد عبدالعزيز واحد من شعراء بلادي كان يمتاز شعره بجمال الوصف التشبيه وعنده قدرة كبيرة في التلاعب بالكلمات شعره عفوي وقصايده مؤثرة وكان قلبه مليان أحاسيس وعيونه فاحصة بتفتش عن الجمال وين ماكان.

وفي يوم من الايام مشي زيارة عادية لجيرانه استقبلته جارته ست الدار بكل ترحاب وفضلته ولما جا داخل وقبل ما يقعد لمح فتاه في ركن البيت وهي متكية في عنقريبا وعيونا كأنها بتخاطبه من غير ماتتكلم سلم عليها من بعيد وهو مبتسم والغربب في الأمر انه البت ماردت السلام إتحير الشاعر قال ياربي يمكن ماسمعت (اتشالق) تاني وكرر السلام المرة دي بصوت أعلى وابتسامة أعرض برضو البت ساكتة ولا إتحركت. استغرب شاعرنا سيد لكن الام قطعت عليه حبل الاستغراب وضحكت وقالت ليه:-(معليش ياسيد دي نايمة ياولدي وعيونا مفتحة كدا خلقة ربنا من ما اتولدت كدا)

الشاعر جن جنونه وبقي في حالة من الانبهار وزاد استغرابه ودهشته ماقادرة يصدق انو الجمال الشايف قدامه دا لفتاة نايمة!؟! ومن هنا بدت الكلمات تدفق في راسه زي السيل رجع بيته وقلبه مولع الإلهام وطول الليل وهو يصور في المشهد البديع الشافته عيونه ويكتب وهو محتار(دي بت نايمة لكن صاحية! ساكنة لكن فيها حياة وجمالا يا الله يجلي النظر ويخلي العقول تحتار مابين النوم والصحيان ومن هنا اتولدت واحدة من أجمل الأغنيات السودانية الميانة سحر تطريب اغنية

*يجلي النظر*

 

يجلى النظر يا صاحى منظر الإنسان الطرفو نايم و صاحى صاحى كالنعسان!!!

 

فى الضي جبينا النادى و البدر خلان تجمع لطافه و رقه و نفرة الغزلان!!!

 

ما بين أن جسيما اللادن الكسلان

يزرى الحرير الناعم و الفريع اللان!!!

 

دعجه و مكحله خلقه عظما الرحمن بجمال كمال الخلقه و وشحا الإيمان!!!

 

هى فى الجمال زى يوسف و الوهيبه كمان تمتاز بجيدا طايل و نهيد رمان!!!

 

انا قلبى طار من صدرى يا حبيبى عشان شفت حور الجنه داخل الحيشان!!!

 

شفت العيون بتقهر ضابط النيشان شفت الجمال الوافر فوق عظيمة الشان!!!

 

ليكى السلام ما غنى شادى أو رطان ليكى السلام ما حن مفارق الأوطان!!!

 

يخضب بنانك حنه و للوريد قيطان و أنيل رضاك يا ملكه نجلة السلطان

لحنها وغناهاالفنان الحاج محمد احمد سرور وبعده غنوها فنانين كتار بعده وبايقاعات مختلفة . بالمناسبة اغنية يجلي النظر دي كانت الأغنية البجيزوا بيها أصوات الفنانين في الإذاعة السودانية .