سلوى احمد موية تكتب… حليل يمة

الام ست الحبايب نبع الحنان والحب وست الكمال .. الام العاطفه النبيلة .. الام السند الأمان العطاء دون أن تنتظر عطاء.. البدايات الاولي … الام فخرك وعزك …المعلم الأول.. مدرسة بلا سبورة ولاكراس ولاكتاب ….

تعلمك كيف تكون انسان كامل الدسم … تسعة اشهر تعاني فيهم منك لكنها مبتسمة ضاحكة راضية مستبشرة …. ثم تبدا معك رحلة الحياة وانت جنين تمنحك كل عطف وحنان الدنيا ولا يغمض لها جفن حتي تنام انت مرتاحا… ثم تبدا مرحلة المشي وتكون اسعد انسانه في الكون انك بدت تقف علي رجليك وخطيت الخطوة الأولى حنينه انتي ياامي ياقطعه من دمي وياكلي يا عمري …

امك غطاك في البرد وملاذك في الصيف وأمانك في الخريف هي حماك في كل مواسم الحياة بخوفها عليك لايمكن ان تترك تغيب عن عينها لحظه … و تبدا مرحلة الدراسة قايمة الصباح متكفلتي شايلا الحليلة علي المراح جبتي اللبن بانشراح والساعة ديك يادوب ديكنا بدا الصياح …

عظيمة انتي يااجمل ام … نجهز للمدرسة ويلا يااولادي اتاخرتو … كتابك امس لقيتك جادعو لميتو ليك في الدولاب بعد غسلت ليك هدوم المدرسة …. حليلك يانبع الحنان شايلا همي وانا ولا علي بالي …. ودايما نحن في بالك الولد ده الليلة اتاخر في المدرسةالحاصل شنو؟؟ ..ياحاجة روقي الود لسة زمنه ماجا ارتاحي شوية.. البت دي نايمة مالا؟ ماتكون عيانة؟ تجي تختي يدك على رأسا وتحمدي الله انها نومة عافية..

صحيت انت ياولدي ارص ليك الغدا عشان تستحم وتراجع دروسك؟؟ مابترتاحي ولابتطمئني الا نكون كلنا قدام عينك تتأكدي اننا طيبين…. كبيرة انتي ياامي ….

وكل مااكبر امي شايفاني لسه شافع وبتخافي على اصلو قلب الوالد … امي الله اسلمك واديك لي طول العمر في الدنيا يوم ما يألمك ..يمة ياست الجمال ياامي خوفك علي بالحيل كتير…

انها الام تواصل رحلة المسير مع الابناء كبرنا وكبرت احزانا ولسه الام بنفس الخوف ونفس الشاشة والحنية ونفس …. انها الام التي كرمها الله وهي احب الناس لحسن صحابتي … رددها رسول الله صلي الله عليه وسلم امك ثم امك ثم امك ….

عليك افضل الصلاة وازكي التسليم يامن فقدت الام والاب وانت صغير … الام ذلك المخلوق الرباني العطوف مليان شوق وحنينه …. تساهر بمرضك تفرح بفرحك تحزن بحزنك …

الام رحلة عمر وتعب سنين من الحمل بمشقته وألآم الولادة وتعب التربية تسهر على راحة أولادها وتقدم كل طاقتا ومجهودا دون مقابل تفاصليا لا تكتبها الصفحات ولابتكفي لزكر فضايلا نحن مانقدر نوفيها حقها ولا جزو قليل ..

حقوقها علينا كثيرة لا تحصي ولا تعد … الام عظمتها كل الاديان وكرما الاسلام ختاها في مكانة عالية ربط الإحسان للأم بعبادة الله جل وعلا جعل برها طاعة واجبة الا اذا أمرت بمعصية البر ثم البر ثم البر . الام تلكم الانسانه التي تحمل كل معاني الحياة وكل تفاصيل العمر … ياولدي دايرة احضر جديدك واشيل وليدك …

يا لها من تفاصيل ربتني ثم تريد ان تربي ابناءي يالك من صبورة ويالك من وفية …. ده اليوم الدايرنو ليك يوم سعدك …. الام كلمة ومعني عظيم كل اورق واقلام الدنيا مابتقدر تكتب عنها.. في حاجات بتتحس ما بتتكتب …. بروها عظموها تفتح ليكم ابواب السماء والجنات وياتيك الرزق من حيث تدري ولا تدري …

الرحمة لكل الامهات الائي توفاهن الله وان يجعله من سيدات الجنة في اعلي الجنان … والصحة والعافيه للعايشات منهن …

خليك ولد بار وشيل رضا امك صباح ومساء ومهما تقصر في حقها ما بتسمع منها غير عافيه منك وراضيه عليك ..بروها حية وبعد الممات تنالوا الأجر والثواب..

ادعوا لامهاتكم بالصحة والعافية لانه وجود الام نعمة عبروا عن حبكم ليها اهتموا بيها واحترموها لانه الجنة تحت أقدام الأمهات ياحصني لو جار الزمان ختيتي في قلبي اليقين يا مطمناني بطمنك. اللهم إرحم امي وامهات المسلمين.