سلوى احمد موية تكتب… حب الناس يحبوك
الإيجابية التصالح مع النفس وحب الخير للغير كلها صفات سمحة لو مسكنا فيها ح نعيش الحياة ببساطة ورضا وقبول ولأنها صفات جميلة بتولد الشعور بالسعادة والفرح والطاقة البتقوينا لمواجهة الصعوبات وضغوطات الحياة.
الرضا بالواقع التأقلم عليه بقوي فينا التمسك بالحياة والتصالح معاها وبخلينا ننظر للحاجات بشكل إيجابي وبقلل من الأفكار السالبة والتوتر وبتخفف الأوجاع بزيد شعورنا بالرضا والتصالح.
مع ضغوط الحياة الكل يوم في زيادة الدعم العاطفي الاجتماعي مطلوب عشان نتخطى العقبات ونعبر لبر الأمان نتقبل بعض بكل النقص الفينا وعيوبنا وثقراتنا عشان نبني علاقات صحية قوية ومتينةومتوازنة نساعد المخطى في تجاوز الخطأ ونشجع السلوك القويم ونتجنب السلوك السالب عشان نعزز استمرار العلاقات لفترة أطول.
بالحب والإيجابية نساهم في تحسين الصحة النفسية والبدنية لأفراد المجتمع ونقلل من خطر الإصابة بأمراض القلب وتخفيف مستوى التوتر والاكتئاب ومعظم الدراسات أكدت انه العلاقات العاطفية الصحية بتطول العمر وبتخلي الفرد دايما في تطور مستمر ويبحث عن النجاح والتميز. حب حياتك وعيشا زي ماهي افرح اضحك اتبسط والشي البتقدر تغيرو غيرو للأفضل لانه النقص صفة فينا ماعيب. الحياة مستمرة لو فرحنا ولابكينا ركزوا على الأشخاص الإيجابيين ابعدوا عن كل شخص سلبي لانه السلبية مرض قاتل لابخليك تستمتع بلحظة حلوة ولا بخليك تنظر نظرة متفائلة للمستقبل الناس حولك بتزدهر وتنمو وانت بتزبل.
حبوا بعض الحب احساس بمد الإنسان بالطاقة القوة والثقة اقضوا أوقاتكم مع ناس ايجابيين عشان تحسوا بطعم الحياة وتستلذوا بنعمة المحبة والإمتنان حبوا الخير لغيركم لانه دي من صفات المؤمنين. الحياة بسيطة وسهلة نحن البنعقدا وبنصعبا بالتشاؤم الاحباط والشكوك نحن البنقفل كل أبواب السعادة بنظرتنا السطحية والسلبية للأمور. الحب شكل من أشكال الطاقة الروحية تبدأ بالروح وتنتقل ل العالم الجسدي من الأفعال حتى نصل لإنتاج مشاعر عاطفية متينة يقويها الحب والإيجابية بدلا عن الغضب والحقد والحسد التشاؤم.
فتشوا عن لحظات بتشعروا فيها بالاسترخاء والسكينة والطمأنينة لخلق عالم من الإيجابية والفكر السليم لانه الروح مصبوغة بلون الفكر ابنوا روابط اجتماعية متينة مؤسسة علي الثقة والحب والتفضيل، ولصنع النجاح وجهوا تركيزكم نحو الأهداف لان الحب يولد هرمون السعادة ويشعرك بصحة جيدة ونشاط لايقاوم وقدرة على فعل المعجزات. تمتعوا بالعاطفة الإيجابية العالية لزيادة الحماس والحيوية والثقة لمواجهة صعوبات الحياة وتقلباتا، ازرعوا الحب تحصدوا المحبة والجمال والسماح وقلوب الناس.
التفكير الإيجابي هو مفتاح النجاح والسعادة، فكر في صنع الحلول بدل ما تركز على العقبات كل مشكلة وليها حل درب عقلك على التفكير الإيجابي تقبل الفشل كجزو من عملية النجاح خليك مرن في التعامل واتعلم التغاضي والتجاهل عشان العلاقات الحلوة تستمر وحب الناس بحبوك .
