(خمة نفس) عبدالوهاب السنجك يكتب: يجب ان نعترف كلنا لصوص

@.. نعم يجب ان نعترف باننا كلنا لصوص.. كلنا لصوص، كيف ذلك..؟ ولما الاتهام؟؟

@.. قبض احدهم راتبة الشهري حيث لم يكن مواظبا طيلة الشهر بل كان ليس له حضورا الا في منتصف الاسبوع و(يكب الزوغ) فتجده عند شباك الصراف عامل غلبه شديده.. ليه مانزلوا لينا قروش الوجبة والبدلات.. و.. وَ.

كأنه كان مداوما ومواظبا طيلة ايام الشهر..

 

@..بعد ان قبض مرتبه الشهري تسلل من بين الجميع وصولا لموقف الحافلات منتشيا فرحا لانه سوف يشتري اليوم دجاج مشوي و.. و..

وهو يتحدث همسا ما كفاية اكل العدس والسلطة والسخينة..الهردت مصارينا ديل اليوم نغير شوية..

 

@.. قفز بداخل الحافلة غير انه لم يجد مقعدا ليجلس عليه الا انه تسمر وقوفا فهو لا يعلم هناك من باعة اخر اشتراه ببضع جنيهات مع خروجه من بوابة الوزارة.. انه لصيد ثمين.

 

@.. النشال يقف من خلفه واضعا كتفه علي ظهره ويده تلاطف جيب صديقنا..المسكين…

 

@..كمساري الحافلة وباصبعية (يطقطق)…

 

@.. ادخل صاحبنا يده في جيبه باحثا الربطة النقدية فلم يجدها فتصبب عرقا وجف حلقه، ملتفا يمينا ويسارا مهمها بكلمات متقطعة غير مفهومة.

 

@.. الكمساري.. يازول ادينا حقنا انت كان ما عندك ما تقول ما عندي قبل ما تركب، كمان اخر شياكة قميص وبنطلون وما عندك ابوالنوم ذاتو.. كرهتونا الشغل …

 

@.. يا ابن العم والله صرفت الماهية اسع لكن يظهر وقعت مني..

 

@.الكمساري..قال وقعت مني قال.. بالله العب غيراا

 

@.. احدهم.. ياجماعة مالكم… في شنو؟؟

 

@..الكمساري مافي حاجة بس الواحد لمن يكون زول كبير ما يسرقنا نحنا المساكين ديل..

 

@.. النشال.. انت الما دفع ليك منو.. ولا اقول ليك الحافلة دي حرم وعلي الطلاق كلها علي.. وانت يا استاذ هاك القروش دي اركب بيها المواصلات واشتري لاولادك العايز تشتريهو.. حرم ما تقول اي حاجة. َ. .تاني عندك كلام ياكمساري.

 

@..الكمساري.. ما عندي اي كلاااام بس حقنا..

 

@..المشهد..

راكب الحافلة يقدمون الثناء والشكر لذاك.. (النشال)

 

@..الله يفتح عليك ويعدل طريقك ياراجل ياود الاصول.. والله يكتر من امثالك ويزيد ويبارك فيهم..

 

@..قفز النشال من باب الحافلة في المحطة الاولي مختفيا من الانظار.. تاركا ضحيته من خلفه مودعا الراكب الذين دعوا له بالصحة والعافية والرزق الكتير وان يكتر من امثاله.

 

 

@.. فاستجاب الله دعوة الداعيين.. فاليوم كلنا لصوص..نسرق التوقيت ونتلكأ في خدمة المواطن.. ننظر لجيبه من قبل مستنداته،.، نسرق الدولة.. نسرق انفسنا بانفسنا.. انها دعوة اصابتنا ولن ننجو منها من غير التوسل لله ان يغفر لنا.. فهو الغفور الرحيم.

 

(خمة نفس)

الي والي ولاية الجزيرة الي مدير عام وزارة التخطيط العمراني الوزير المفوض الي مدير عام وزارة التربية والتعليم.. المدرسة الشرقية (احمد عبدالعزيز بنين.. العدوية بنات) الا تتفقوا معي بان الدور انتهي بانتهاء مربع (٥٠) الذي تم تغير غرضة من سكني لاقتصادي.. ام بقعر السعن رواااااب يا ادارة المدرسة..

لن نترك الحبل علي القارب ابداَ.

 

(خمة نفس)

ماذا عن غابة امبارونا السياحية ياسادة.. وهل سيصدر قرار لتبعيتها لهيئة والغابات ام ستبقي هكذا تحت ادارة محلية ودمدني الكبري.