(خمة نفس) عبدالوهاب السنجك يكتب : الإمارات في فتيل..” بل بس” 

@ حاج سيداحمد، زول نصحيه، مايرضي الحقارة تب، زول دغري زي قضيب السكة حديد ما يتعوج،، لانو لو اتعوج بقلب القطر فوق تحت، ما كان قايل الحكاية بتدور كدااا، ماسك خشموا ساااكت، وكلامو القالو لي حاج حمد “ابوالعريف” ما وقع واطه والليلة فرحان عايز يموت من الفرح عشان كلامو وقولو بقى حقيقة..

… ابوالعريف جاهو عجاجتو تلوي.. سلاااام ياحاج سيداحمد.

 

وعليكم السلاااام… لكن انا ياحاج حمد

انا ماقلت ليكم..

 

@ قلت شنو ورينا قولك..

 

#قولي.. خلوهو اسع دااا

 

@ حرم ياحاج سيداحمد مانخلي قولك.. قول لينا ما اصلوا بقينا زي ناس الزهايمر نرجف وننسى. النزوح خلي فينا حاجة..

 

# قلت ليكم الإمارات دي بي تقعد واطة ويجي اليوم تسف فيهو التراب ، هي ما عاملة نفسها ماسكة العالم بيدها لكن انت يابوالعريف بتصدقني ما اصلوا راسك فاضي ساااكت.. ما ناقش حاجة

 

@طيب يادكتور يا ابوالسياسة ورينا الإمارات سفت التراب كيفن..

 

#طيب اسمعني كويس ما تقاطعني.. ما اصلو هي لاعبة فردة مع إسرائيل، وماداا كراعينا هنا وهناك، دخلت يدها عندنا هنا وقدمت كل حاجة لمليشيا ال دقلو لكن الجيش والشعب كانوا واعيين وراكيز طردوا المليشيا من الخرطوم والجزيرة وسنار واسع شغل فتك متك وبل بس، في جنوب كردفان وداخلين على شمال دارفور، وعمك الكاهن كان في تركيا ومصر وقبلها في السعودية، يعني شرك ام زيردوا.. العالم كلوا عرف وشاف الجرائم السواها ولد زايد والمتمردين في الخرطوم والجزيرة والفاشر وبابنوسة، لكن ياحاج حمد ولد زايد ما وقف لي هنا مد لسانو لي السعودية كمان،

 

@كيفن مد لسانو للسعودية ياحاج سيداحمد.

 

# ما اصلوا ما عندهم فهم ولا خوه.. قامو رسلو سلاح وعتاد لليمن من دون شورة وشلاقة ساااااكت.. الطيران السعودي رب.. رب غطس حجر سفتين في ميناء المكلا والقيامة قامت، وقالوا ولد زايد ما نشوفك في اليمن وعندك ساعات اطلع من هنا ولا تشوف مننا النجوم عز النهار.

 

@وتاني حصل شنو ياحاج سيداحمد

 

# الإمارات قالت خلاص انا طالعة من هنا وطلعت وقالت انا انسحبت بارادتي.. يعني ياحاج حمد دي هزيمة كبيرة ليها، واسع السعودية شغالة تصفية في وجود الإمارات في المنطقة وخلاص بقى تحتضر ومحاصرة من كل الجهات، ودي الفرصة المناسبة ياحاج لتصفية وطرد الإمارات الإرهابية من السودان.

 

@ شنو يعني الكلام دا

 

# الكلام دا ياابو العريف، دويلة الإمارات تواجه هزيمة كبيرة وعلى الدول العربية تستفيد من الحاصل داا وإبعادا من الشغالة فيهو داا واسع يا يابوالعريف بعد اخدت ضربة قوية من الطيران السعودي قالت الروب عديييل وسحبت قواتا من اليمن..

 

@ ونحنا هنا في السودان ياحاج سيداحمد ما شغالة تمد في المتمردين من تشاد وليبيا وجنوب السودان بالسلاح والمرتزقة من كولومبيا.

 

# نحنا ياحاج “الجديد وصل” (وكشف بس) ما عندنا ليهم حاجة كان هم ولا غيرن..الإمارات في فتيل يافردة.. فتك متك.. بل.. بس… نحنا البلوسي ياصاحبي..

شعب واحد.. جيش واحد..مشتركة فوق.. دراعة للسمع والطاعة، تمبور قدام.. تاني عايز حاجة يا حاج حمد، بالله امشي كلم حاجة نفيسة تسوي لينا قهوة نشربا ببمزاج ما صلوا فيلم بن زايد انتهى.. قلنا انتهى معناها انتهى…تاني مليشيا دقلو الا تقول خلاص كفاية ما هرتونا هرد كملتونا وما فضلوا فينا نفاخ النار..

 

(خمة نفس)

اغلب الدول لديها شرطة خاصة للأسواق من أعلى رتبة لا أصغر جندي.. وزي خاص…ومحكمة خاصة وقانون خاص…وكشف صحي و.. و.. الممنوع ممنوع.. نحنا عندنا الممنوع مرغوب…مطاردات ودقي يامزيكا.. لمتين يارجالا.. العود انكسر.